Премьер-министр Андрей Назаров туберкулездың донъя кимәлендәге сир булыуы һәм донъяла йоғошло ауырыуҙар араһында коронавирустан ҡала икенсе урын биләүе тураһында һөйләне. Йыл һайын был сирҙән 10 миллиондан ашыу кеше вафат була. Шул уҡ ваҡытта Рәсәйҙә һуңғы ике йылда был сир менән сирләү күрһәткестәре буйынса тарихи минимум теркәлгән. - 2000 йыл менән сағыштырғанда, Башҡортостанда был сир менән сирләү – ике, үлем осраҡтары дүрт тапҡырға кәмегән. Йыл башынан туберкулез буйынса эпидемиологик хәлдең яҡшырыуы күҙәтелә. Республикала сирләү быйыл туғыҙ айҙа, былтырғы ошо уҡ осор менән сағыштырғанда, 13,4 процентҡа, балалар араһында 8,3 процентҡа кәмегән. Был – һаулыҡ һаҡлау өлкәһендәге дәүләт сәйәсәтен тормошҡа ашырыу һәм туберкулезға ҡаршы хеҙмәт белгестәренең системалы эше, - тип һыҙыҡ өҫтөнә алды Андрей Назаров. Ейәнсура, Федоровка, Мәсетле райондарында күберәк сирләү осраҡтары теркәлгән. Бүздәк, Архангел һәм Йылайыр райондарында аҙыраҡ. Ағиҙел ҡалаһында бер генә лә туберкулез осрағы теркәлмәгән. Республиканың һаулыҡ һаҡлау министры Айрат Рәхмәтуллиндың белдереүенсә, үлем осраҡтарын кәметеү өсөн бер нисә комплекслы сара ҡабул ителгән, паллиатив койкалар булдырылған, 15 табип комиссияһының эше үҙгәртеп ҡоролған. Министрлыҡ ҡарамағында Фтизиатрҙар советы булдырылған. Фтизиатрҙар хеҙмәте Мотлаҡ медицина страховкалауы фонды аҡсаһынан финанслауға күскән. Был медицина ярҙамын күрһәтеү сифатын контролләү һәм унан файҙаланыу сифатын яҡшыртҡан. Бынан тыш, медицина хеҙмәткәрҙәре электрон документтар әйләнешен тулыһынса үҙләштергән, амбулатория этабындағы дауалау сифатын арттырыу өсөн үҙҙәренең “Минең фтизиатр” тип исемләнгән программаһын сафҡа индергән. - Бөгөн төп маҡсат – туберкулездан сирләү һәм үлем осраҡтарын кәметеү, - тип белдерҙе Башҡортостан Хөкүмәте Премьер-министры Андрей Назаров. Ул республиканың Һаулыҡ һаҡлау министрлығына был ауырыуҙан сирләү һәм үлеү осраҡтары күп булған райондарҙағы предприятиелар етәкселәре менән эште әүҙемләштерергә ҡушты. Фото, сығанаҡ: pravitelstvorb.ru/news/22286/