Өфөлә махсус хәрби операция ветерандары араһында “Ватан һаҡсылары кубогы” төбәк-ара комплекслы физкультура сараһы башланды. Беренсе тапҡыр бындай ярыштар Кемеров өлкәһендә ойошторолған. Башҡортостан иһә ошондай сараны уҙғарасаҡ икенсе төбәк. Алты спорт төрө буйынса көс һынашалар. Сараға Рәсәйҙең Волга буйы һәм Урал федераль округтарының йыйылма командалар килгән. Киров, Ҡурған, Түбәнге Новгород, Ырымбур, Һамар, Һарытау, Свердловск, Төмән, Ульяновск, Силәбе өлкәләренән, Пермь крайынан, Мари Иле, Мордовия, Татарстан, Удмуртия, Сыуашстан республикаларынан, Ханты-Манси, Ямал-Ненецк автономиялы округтарынан һәм Башҡортостандан командалар үҙ көсөн һынай. Мәҫәлән, республикабыҙҙың йыйылма командаһында өс Ҡаһарманлыҡ ордены, дүрт “Батырлыҡ өсөн” миҙалы, ике Шайморатов һәм башҡа наградалар кавалерҙары бар. Команданың капитаны – Тимур Лоҡманов. Башҡортостан Республикаһы махсус хәрби операцияла батырлыҡ ҡылған яугирҙәрҙең исемдәре менән ғорурлана. Башҡортостанда тыуып үҫкән алты яҡташыбыҙ “Рәсәй Геройы” тигән юғары исемгә лайыҡ булды. Ҡыҙғанысҡа ҡаршы, уларҙың дүртәүһе Алтын Йондоҙ менән үлгәндән һуң наградланды. Улар – Әбйәлил районында тыуып үҫкән ракетчик, прапорщик Тамерлан Илһамов, Яңауылдан танкист, өлкән лейтенант Игорь Нәсибуллин, Өфөнән, разведчик, өлкән лейтенант Максим Серафимов, Әлшәй егете, десантниктар взводы командиры, старшина Алмаз Сафин. Рәсәй Президенты Октябрьскийҙан өлкән лейтенант Степан Беловҡа һәм Бөрөнән гвардия майоры Борис Дудкоға Рәсәй Геройы йондоҙҙарын шәхсән үҙе тапшырҙы. Өфөлә махсус хәрби операция ветерандары араһында “Ватан һаҡсылары кубогы” төбәк-ара комплекслы физкультура сараһында ҡатнашыусыларҙы “Ватан һаҡсылары” дәүләт фонды етәксеһе Анна Цивилева видеомөрәжәғәт менән сығыш яһаны. Башҡортостан Хөкүмәте Премьер-министры урынбаҫары – финанс министры Лира Иғтисамова Башҡортостан Республикаһы Башлығы Радий Хәбировтың ҡотлау сәләмен еткерҙе. - Өфө Рәсәйҙең 20-нән ашыу төбәгенән 100-ҙән ашыу ҡатнашыусыны ҡабул итте. Һеҙҙең ҡаһарманлығығыҙ, батырлығығыҙ өсөн ҙур рәхмәт, – тине Лира Закуан ҡыҙы. – Еңеү мөһим түгел, ҡатнашыу мөһим. Сараға килгәндәрҙең барыһы ла герой! Рәсәй Паралимпия комитеты президенты Павел Рожков Тыуған илде һаҡлағандарға, махсус хәрби операцияла ҡатнашыусыларға, ошо сараны ойошторған Башҡортостан Хөкүмәтенә, республикабыҙ Башлығы Радий Хәбировҡа рәхмәт белдерҙе. Ул шулай уҡ республикала спортҡа, шулай уҡ паралимпиясыларға етди иғтибар бүленеүе тураһында әйтте. – Өфөләге Рима Баталова исемендәге спот әҙерлеге кеүек үҙәктең аналогы Рәсәйҙә лә, донъяла ла юҡ, – тине Павел Алексеевич. Рәсәй Геройы Алексей Романов Роберт Рождественскийҙың “Беренсе булығыҙ!” тигән шиғри юлдарҙы ла килтерҙе: - Бар икәнһегеҙ, беренсе булығыҙ. Кем генә булһағыҙ ҙа, беренсе булығыҙ! – тигән теләген еткерҙе ул. 100-ҙән 5000 метрға тиклем йүгереү буйынса 13 тапҡыр Паралимпия уйындары, 18 тапҡыр донъя, 43 тапҡыр Европа чемпионы, Рәсәйҙең атҡаҙанған спорт мастеры, Рәсәй Дәүләт Думаһы депутаты Рима Баталова Рәсәй Дәүләт Думаһының Физик культура һәм спорт комитеты, шәхсән үҙенең исеменән сәләмләне. – Бер ҡасан да бирешмәгеҙ, егеттәр! Герой булып тыумайҙар, герой булалар, – тине ул сығышында. Ярыштарға стартты иһә республиканың спорт министры Руслан Хәбибов бирҙе. Бөгөн сарала ҡатнашыусыларға Паралимпия дәрестәре, спорттың Паралимпия төрҙәре буйынса оҫталыҡ дәрестәре ойошторолдо. Шулай уҡ өҫтәл теннисы, армрестлинг, пауэрлифтинг, пуля атыу, уҡ атыу, ултырған көйөнсә волейбол уйнау буйынса ярыштар бара. Башҡортостан йыйылма командаһы составында 14 ветеран ҡатнаша. Улар араһында һөнәри спортсылар юҡ. Командала – үҙҙәре теләк белдергәндәр. Уларҙың сараға әҙерлеге өсөн республиканың Спорт министрлығы тарафынан урындарҙа күнекмәләр үткәреү өсөн барлыҡ шарттар булдырылған ине. Улар Өфөгә алдан килеп, ярыштарға әҙерлекте дауам итте. “Ватан һаҡсылары кубогы” – спорттың адаптив төрҙәре буйынса программаға старт ул. Уға яугирҙәребеҙҙе, махсус хәрби операция ветерандарын, хәрби нөктәләрҙә ҡатнашҡан һаулыҡ мөмкинлектәре сикләнгәндәрҙе йәлеп ителә. Был уларҙың үҙ-үҙҙәренә бикләнеп ҡалмауы, сәләмәт тормош алып барыуы һәм спорт менән шөғөлләнеүе өсөн кәрәк. Был хаҡта ярыштар алдынан “Башинформ” агентлығында үткәрелгән матбуғат сараһында “Ватан һаҡсылары” фондының Башҡортостан Республикаһындағы филиалы етәксеһе Гөлнур Ҡолһарина белдергәйне. Ул бөгөн дә был спорт сараһын асыу тантанаһында ҡатнашты. Әйткәндәй, сара сиктәрендә ветерандар һәм махсус хәрби операцияла ҡатнашыусыларҙың ғаилә ағзалары өсөн илһөйәрлек фестивале була. 22 ноябрҙә Ауыл хужалығы министрлығының Колонналар залында “Геройҙар ваҡыты” түңәрәк өҫтәле үткәрелә. Автор фотолары.