Ялдарында тик ятмайҙар

Бөгөн, 21 ноябрҙә, ҡыҫҡа ваҡытлы ялған ҡайтҡан махсус хәрби операцияла ҡатнашҡан “Башҡортостан” полкы яугирҙәре “Ҡайғылы әсә” мемориалына сәскә һалды. Улар менән бергә ҡатындары, балалары, туғандары һәм яҡындары ла килгәйне. Яугирҙәрҙе “Башҡортостан” мотоуҡсылар полкы командирының тәрбиә эше буйынса урынбаҫары, подполковник Рөстәм Шаһабетдинов һәм республиканың Хәрби дан музейы директоры Илшат Үтәев сәләмләне. Унан һуң ҡунаҡтар Республика Дан музейына инделәр. Музей директоры Илшат Үтәев әйтеүенсә, улар осрашыу ваҡытында неонацизмдың әйләнеп ҡайтыуы темаһына һөйләшкән. – Теге ваҡытта нацизм еңелде тип иҫәпләнә ине, тик, ҡыҙғанысҡа ҡаршы, беҙҙең көндәрҙә ул яңырҙы. Һәм беҙҙең егеттәргә ҡулына ҡорал алырға һәм алышҡа сығырға тура килде. Улар дошманды тоторға, беҙҙең биләмәгә инеүенә юл ҡуймаҫҡа тейеш, – тине ул. Илшат Үтәев әйтеүенсә, тарихта барыһы ла бер-береһенә бәйле. – Беҙҙең музей башлыса Бөйөк Ватан һуғышы темаһына бағышлана. Экспозицияларҙың береһе легендар 112-се Башҡорт кавалерия дивизияһына арналған, улар һуғыш йылдарында Донбассты азат иткәйне. Шунда уҡ дивизия командиры, генерал-майор Миңлеғәле Шайморатов һәләк булды. Тап шуға күрә лә Башҡортостан менән Донбасстың бәйләнештәре тығыҙ, – ти музей директоры. – Унда беҙҙе ныҡ яраталар, ҡәҙерләйҙәр һәм дивизиябыҙ тураһында хәтерҙе һаҡлайҙар. Бынан тыш беҙҙең республика әүҙем рәүештә Луганск Халыҡ Республикаһының айырым ҡалаларын төҙөкләндереүҙә ярҙам итә. Музей коллективы яугирҙәргә МХО-ла ҡатнашыусыларға арналған экспозицияны күрһәтте. Бында хәрбиҙәр үҙҙәре килтергән әйберҙәр ҙә байтаҡ. Музей хеҙмәткәрҙәре тапшырылған экспонаттарҙы бүлектәр, категориялар буйынса бүлә һәм бик һаҡсыл итеп һаҡлай. Күргәҙмә стендтарында Рәсәй Федерацияһы геройҙары ҡуйылған. – Башҡортостанда 37 Рәсәй Геройы бар. Уларҙың етәүһе, яңы геройҙар. Улар был исемде МХО барышында алған. Ҡыҙғанысҡа ҡаршы, дүртәүһе был исемле үлгәндән һуң алды, – тине Илшат Үтәев. “Үҙ Донбассыбыҙҙы яҡлағанда” күргәҙмәһе эсенә интерактив зонаны ла индерә. Һәр теләгән кеше еңеүгә үҙ өлөшөн индерә ала: маскировка селтәренә таҫма үрергә йәки һалдатҡа хат яҙырға була. Музей хеҙмәткәрҙәре лә буш ваҡытында ирекмәнлек эше алып бара. – Осрашыу бик матур килеп сыҡты. Хәрбиҙәр беҙҙә ошондай күргәҙмә булғанына ғәжәпләнде. Ҡайһы берәүҙәр музейға үҙ әйберҙәрен бирҙе: мундир өлөштәре, шеврондар, – ти музей директоры. МХО-ла ҡатнашыусылар менән Башҡорт иҡтисади юридик колледжы студенттары аралашты, улар музейға лекторийға килгән ине. Йәштәр һалдаттарға төрлө һорауҙар биргән һәм бик ҙур ҡыҙыҡһыныу күрһәткән. Мәҫәлән, “Башҡортостан” батальоны составында тик доброволецтар ғына хеҙмәт итеүе асыҡланды. Был аралашыу менән ике яҡ та ҡәнәғәт ҡалды. Фотолар Республика Дан музейынан.