Найти тему
Башҡортостан гәзите

Гүзәл Нәбиева – абруйлы конкурс еңеүсеһе

Өфөлә “Ҡатын-ҡыҙ – йыл директоры” Бөтә Рәсәй конкурсының төбәк этабына йомғаҡ яһанылар. Ул “Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү” милли проектын тормошҡа ашырыу сиктәрендә үткәрелә. Эшлекле бәйгелә республиканың 50 предприятиеһы һәм ойошмаһы етәксеһе ҡатнашты. Нефтекама ҡалаһынан “Бухгалтер плюс” яуаплылығы сикләнгән йәмғиәте директоры Гүзәл Нәбиева сығыш яһаны. Ул консалтинг хеҙмәттәре күрһәткән предприятие менән етәкселек итә. Бынан тыш, бизнес-леди “Рәсәй терәге” Башҡортостан төбәк бүлексәһенең Нефтекама урындағы бүлексәһе етәксеһе һәм Башҡортостан Бухгалтерҙары ассоциацияһы ағзаһы булып тора. Конкурсҡа ул предприятиеһы буйынса документация, үҙенең ҡаҙаныштарын тәҡдим иткән. Улар араһында ҡала һәм республика конкурстарында, шул иҫәптән “Йыл һалым түләүсеһе” бәйгеһендә ҡатнашыу бар. Предприятие үҙенең йүнәлештәренең береһе тип социаль ярҙамды һайлаған һәм хәйриә эшмәкәрлегендә әүҙем ҡатнаша. “Ҡатын-ҡыҙ – йыл директоры” конкурсының йомғаҡлау этабы республиканың Сауҙа-сәнәғәт палатаһында үткән. Финалистар үҙҙәренең эше һәм йәмәғәт эшмәкәрлеге тураһында видеопрезентация күрһәткән. Конкурс комиссияһы ҡарары буйынса Гүзәл Набиева “Ҡатын-ҡыҙ инициативаһы” номинацияһында еңеүсе дипломына лайыҡ булды. Шулай уҡ уға конкурстың федераль этабында ҡатнашырға тәҡдим иткәндәр. Ул мартта Мәскәүҙә үтәсәк. Билдәле булыуынса, “Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү” (национальный проект “Малое и среднее предпринимательство и поддержка индивидуальной предпринимательской инициативы”) милли проекты Рәсәй Президенты Владимир Путиндың май указы менән булдырылды. Фото: Нефтекама ҡалаһы хакимиәте.