Транспортҡа ҡағылышлы бөтә һорауҙарға яуап бирҙеләр

Башҡортостан юлдаш телевидениеһы “Башҡортостандағы юлдар” исемле брифинг үткәрҙе. Республика Башлығының социаль коммуникациялар буйынса идаралығы етәксеһе, “Башҡортостанға идара итеү үҙәге” проекты етәксеһе Елена Прочаковская ойошторған был сара Рәсәй Транспортсылар көнөнә арналғайны. Тура эфирҙа бирелгән һорауҙарға Башҡортостан Хөкүмәте Премьер-министры урынбаҫары Алан Марзаев менән республиканың транспорт һәм юл хужалығы министры Александр Клебанов яуап бирҙеләр. Брифингтың көнүҙәк темаларының береһе – Башҡортостан делегацияһының Мәскәүҙә “Транспорт аҙналығы”нда ҡатнашыуы. “Беҙҙе федераль кимәлдә лә ишетәләр тип, ышаныс менән әйтә алам. Башҡортостан Башлығы Радий Фәрит улы Хәбиров етәкселегендәге делегация мөһим осрашыуҙар үткәрҙе”, – ти Алан Марзаев. Башҡортостандың иң масштаблы инфраструктура проекттарының береһе – “Көнсығыш сығыу юлы”. Быйылғы ноябргә уның әҙерлеге 78 процент тәшкил итә. Объект төҙөлөшөндә ике меңдән ашыу кеше һәм 200-ҙән артыҡ махсус техника эшләй. Шулай уҡ башҡа ҙур проекттар буйынса ла эш әүҙем бара. Улар араһында – Өфөлә Интернациональ урамы сатындағы Ағиҙел аша күпер. “Ул бик ҡиммәтле, әммә кәрәкле объект,” – тине Алан Марзаев. Өфөнөң 450 йыллығына ҡарата “Көньяҡ ҡапҡа” проекты тормошҡа ашырыла башланы. Ул Пугачев урамын реконструкциялауҙы ла, Генерал Рыленко урамы төҙөүҙе һәм улар араһында транспорт сиселеше булдырыуҙы ла күҙ уңында тота. Оҙаҡламай юлдарҙы ҡарҙан таҙартыу зарурлығы тыуасаҡ. Транспорттың һәм юлдарҙың ҡышҡа әҙерлеге тураһында Александр Клебанов һөйләне. Брифингта шулай уҡ әле әйтеп үтелгән объекттарҙан видеобәйләнеш аша интервьюлар бирелде, телевизор ҡараусыларҙан килгән һорауҙар титрҙар рәүешендә барҙы. Фото: БР Транспорт һәм юл хужалығы министрлығы.