Башҡортостан илдә беренселәрҙән булып “Рәсәйҙә уйлап табылған” проектын тормошҡа ашыра. Ул кешеләрҙе креатив һөнәрҙәргә өйрәтеүгә йүнәлтелгән һәм төбәктә креатив индустрияны үҫтереүгә яңы һулыш бирәсәк. Был турала бөгөнгө Хөкүмәт кәңәшмәһендә мәҙәниәт министры Әминә Шафиҡова хәбәр ите. – “Рәсәйҙә уйлап табылған” проекты креатив индустриялар мәктәбен, прототиплаштырыу үҙәктәре, инклюзив ижади лабораториялар, “Урын генийы” таланттарҙы берләштереү нөктәләрен һәм ҡала креатив киңлектәр булдырыуҙы күҙ уңында тота. Башҡортостан илдә тәүгеләрҙән булып был йүнәлештәрҙең бөтәһен дә тормошҡа ашыра, – тине Әминә Шафиҡова. Проектты тормошҡа ашырыу өсөн 159,5 миллион һум аҡса йәлеп ителгән, уның 140 миллион һумы – федераль бюджеттан. Хәтерегеҙгә төшөрәбеҙ, тәүге креатив индустрия мәктәбен 2022 йылда Стәрлетамаҡта республика мәҙәниәт һәм сәнғәт колледжы нигеҙендә булдырҙылар. Быйыл көҙҙән ошондай уҡ мәктәп Өфө сәнғәт училищеһы нигеҙендә эшләй башланы. Стәрлетамаҡтағы мәктәптә дүрт компетенция буйынса эш алып барыла: тауыш режиссураһы һәм тауыш дизайны, электрон музыка, фото һәм видео етештереү, анимация һәм 3Д-графика. Мәктәпкә бюджет нигеҙендә 12-нән 17 йәшкә тиклемге 80 кешене алғандар. Өфөлә алты йүнәлеш буйынса белем алырға була, бында дизайн һәм VR һәм AR интерактив һанлы технологиялар бар. – Киләһе йылда Сибайҙа ошондай өсөнсө мәктәпте асырға ниәтләйбеҙ. Рәсәй Мәҙәниәт министрлығы финанслауҙы раҫланы, – тине Әминә Шафиҡова. Былтырҙан республикала “Урын генийы” ведомство проекты тормошҡа ашырыла. Башҡортостандың һигеҙ яңы быуын китапханаһы 670 мең һәләтле кешене тупланы. Улар сәнғәт, мода, дизайн, белем биреү, нәшриәт эше һәм журналистика, музыка, яңы медиа һәм телевидение йүнәлешен һайлаған. Радий Хәбиров министрлыҡҡа был эш өсөн рәхмәт әйтте һәм Өфөлә тағы бер ошондай мәктәп асыу мөмкинлеген өйрәнергә ҡушты. Әминә Шафиҡова белдереүенсә, һуңғы ике йылда Рәсәйҙә 67 креатив индустрия мәктәбе асылған. Бындай мәктәптәргә ихтыяж ҙур. Шуға күрә республика тағы бер ошондай учреждение булдырыуға ғариза ебәрәсәк. Фото: Башҡортостан Башлығы сайты.