Кем ул Әлиә?

Белорет районының Инйәр ауылында Әлиә Саматованың ижад кисәһе тураһында “Башҡортостан” гәзитенең Телеграмдағы каналында яҙып сыҡҡас, минән: “Кем ул Әлиә? Быға тиклем уның тураһында әллә ни ишеткәнебеҙ булманы, тип кешеләр ҡыҙыҡһына”, – тип һораған кешеләр ҙә булды. Әлбиттә, бындай һорауҙар яуғас, аптырап та ҡуйҙым, сөнки уның хикәйәләре күптән таралыу алған, китаптар ҙа сығарған. Әлиә Саматова үҙен хикәйәсе, шағирә итеп танытып өлгөрҙө. Шулай булмаһа, уның ижад кисәһенә Белорет район хакимиәте башлығының беренсе урынбаҫары Илгиз Хәйруллин, “Башҡортостан” гәзитенән хеҙмәткәр, яҙыусы, журналист, “Башҡортостан уҡытыусыһы” журналының баш мөхәррире Салауат Кәримов, “Ағиҙел” журналының бүлек мөхәррире, шағир Әхмәр Үтәбай, яҙыусы һәм журналист, "Шоңҡар" журналының яуаплы секретары Венер Исхаҡов, Мифтахетдин Аҡмулла исемендәге педагогия университеты доценты Зәки Әлибаев, ошо уҡыу йорто доценты Сәлимә Таһирова, Башҡортостан Яҙыусылар союзы рәйесе урынбаҫары Искәндәр Хәсәнов, Башҡортостандың атҡаҙанған артисы Искәндәр Ғәзизов, “Урал” гәзитенең баш мөхәррире Сатура Минһажетдинова, мәғариф идаралығынан башҡорт теле уҡытыусылары методисы Лариса Әхмәтшина, Инйәр хакимиәтенең эштәр идарасыһы Ләйсән Юлдашева, “Иҙел башы” яҙыусылар ойошмаһы һәм Учалы яҙыусылар ойошмаһынан вәкилдәр кеүек ҡунаҡтар килеп, сәхнә тултырып ҡотлап, Рәхмәт хаттары, бүләктәр тапшырып тормаҫтар ине. Әлиә Марс ҡыҙы Саматова – Инйәрҙең 2-се мәктәбенең башҡорт теле һәм әҙәбиәте уҡытыусыһы, Башҡортостан Яҙыусылар союзы ағзаһы, “Иҙел башы” яҙыусылар ойошмаһы етәксеһе, “Елмерҙәк” халыҡ, “Ҡолонсаҡ” өлгөлө балалар театрҙарында уйнаған һәүәҫкәр артист, “Баҫҡыста”, “Уртаҡ яҙмыш” китаптары авторы. Уҡытыусы. Остаз. Яҙыусы... уҡыусыларын төрлө түңәрәктәргә ылыҡтыра, уларҙың һәләтен аса, алға маҡсаттар ҡуйып йәшәргә өйрәтә. Ғөмүмән, бар яҡлап та һәләтле булған башҡорт ҡыҙы. Уңыштар һиңә, Әлиә! Рәмилә Мусина фотолары.