Артур Әхмәтханов иҫтәлегенә турнир ил көрәшселәрен йыйҙы

18-19 ноябрҙә Өфөләге “Динамо” спорт комплексында полиция генерал-лейтенанты Артур Фәрүәз улы Әхмәтханов иҫтәлегенә көрәш буйынса Бөтә Рәсәй турниры үткәрелә. Был турнирҙа Рәсәйҙең 24 төбәгенән 152 спортсы ҡатнаша. Тағы Башҡортостандың 16 районынан 108 көрәшсе үҙ көсөн һынай. Ярыштар үткәрелгән ике көндә 2005-2006 һәм 2004 йылғы егеттәр 10 ауырлыҡ үлсәмендә көс һынаша. Бөгөн был сара тантаналы асылды. – Йылдан-йыл был турнир масштаблыраҡ үткәрелә. Башҡортостанда спорттың барлыҡ төрҙәре лә мөһим. Тиккә генә Рәсәй Президенты Владимир Путин киләһе йылда беҙҙә “Рәсәй – спорт иле” форумын үткәреү тураһындағы ҡарарҙы ҡабул итмәне. Киләһе йылда – Өфөнөң 450 йыллығын билдәләгән ваҡытта – Көрәш һарайын асасаҡбыҙ. Ул халыҡ-ара ярыштарҙы үткәреү мөмкинлеген бирәсәк, – тине Башҡортостан Хөкүмәте премьер-министры Андрей Назаров сараны асҡанда. – Артур Фәрүәз улы Әхмәтханов уникаль кеше булды. Ул Башҡортостаны өсөн барыһын да эшләгән илһөйәр юлын үтте. Был турнир абруйың менән тотош ил күләмендә үҫешкә йоғонто яһарға мөмкин икәнлеген күрһәткән сағыу миҫал булды. Башҡортостан Хөкүмәте Премьер-министры урынбаҫары Ирек Сәғитов хоҡуҡ һаҡлау органдары вәкилдәренең, шулай уҡ көрәшселәрҙең Артур Фәрүәз улы Әхмәтханов тураһында яҡты иҫтәлек һаҡлауы, уның үҙенең остазы икәнлеге тураһында әйтте. Башҡортостан буйынса эске эштәр министры вазифаһын башҡарыусы Артур Сәйфуллин республика полицияһының үҙ бурыстарына тоғро хеҙмәткәрҙәргә бай булыуы, Артур Фәрүәз улы Әхмәтхановтың уларҙың береһе булыуы тураһында белдерҙе. Артур Фәрүәз улының улы Азамат атаһының спортҡа ҙур иғтибар бүлеүе, бындай ярыштарҙың үткәрелеүе өсөн ҙур рәхмәт белдерҙе. Сарала шулай уҡ Артур Әхмәтхановтың ҡатыны Фидәлиә Фәнил ҡыҙы ла ҡатнашты. Артур Фәрүәз улы Әхмәтханов 1962 йылдың 15 ноябрендә Салауат районының Торналы ауылында тыуған. 1981 – 1983 йылдарҙа СССР Ҡораллы Көстәрендә хеҙмәт итә. 1985 йылда эске эштәр органдарына хеҙмәткә ҡабул ителә һәм Өфө ҡалаһының енәйәтте тикшереү бүлеге оперуполномоченныйынан алып Өфөнөң Орджоникидзе районы эске эштәр идаралығы начальнигына тиклем үрләй, алты йылға яҡын республика ЮХХДИ-һын етәкләй, 2005-2008 йылдарҙа – Башҡортостандың эске эштәр министры урынбаҫары, йәмәғәт именлеге милицияһы хеҙмәте начальнигы, 2008 – 2016 йылдарҙа Төньяҡ Осетияла эске эштәр министры була. Ул һуңғы көндәренә тиклем Хөкүмәт Премьер-министры урынбаҫары вазифаһында эшләне. Хеҙмәт итеү осоронда Артур Әхмәтханов IV дәрәжә “Ватан алдындағы хеҙмәттәре өсөн” ордены, Салауат Юлаев ордены, II дәрәжә “Ватан алдындағы хеҙмәттәре өсөн” орденының миҙалы, исемле ҡорал, шулай уҡ башҡа дәүләт наградалары менән бүләкләнә. Автор фотолары.