Республика Башлығы студенттар менән осрашты

18 ноябрҙә Башҡортостан Башлығы Радий Хәбиров Рәсәй Геройы Максим Серафимов исемендәге “Патриот” хәрби-патриотик паркында булды. Бында “Мин киләсәкте булдырам” исемле республика вуздарының студенттар активы слеты үтте. Слетта профсоюз ойошмалары һәм студенттар советтары вәкилдәренән 220 кеше ҡатнаша. Улар йәмәғәт эшен ойоштороу буйынса үҙ-ара тәжрибә уртаҡлашты. Төбәк етәксеһе буласаҡ белгестәр менән аралашты, уларҙың артабанғы ғилми һәм хеҙмәт эшмәкәрлеге перспективаларын тикшерҙе. – Беҙ “Патриот” паркында йәштәр менән даими осрашыуҙар үткәрәбеҙ, унда уңайлы йәшәү, шөғөлләнеү, ижади әүҙемлек һәм тиҫтерҙәре менән аралашыу өсөн бөтә шарттар булдырҙыҡ, – тине Радий Хәбиров. – Һәм, әлбиттә, бындай осрашыуҙарҙа беҙ пландарыбыҙ, йәштәр сәйәсәтенең өҫтөнлөктәре хаҡында һөйләйбеҙ. Һеҙ – республикабыҙҙың киләсәге. Әлбиттә, бер нисә йылдан Башҡортостандың үҫеш йүнәлештәрен билдәләй ҙә башларһығыҙ. Әлегә беҙҙең бурыс бер-беребеҙҙе аңлау. Һеҙ шулай уҡ беҙҙең идара итеү командаһының нимә менән шөғөлләнеүен, республиканың нисек үҫешеүен күрергә тейешһегеҙ. Ә беҙ, үҙ сиратыбыҙҙа, килеп тыуған проблемаларҙы хәл итеүҙә һеҙҙе нимә борсоуын аңларға, ярҙам итергә теләйбеҙ. Был рәсми булмаған аралашыу барышында Радий Хәбиров студенттарҙың көнүҙәк һорауҙарына яуап бирҙе. Атап әйткәндә, йәштәр республика Башлығынан “Башҡорт оҙон ғүмерлелеге” һәм “мәктәп туризмы” проекттары кеүек студенттар туризмы программаһын булдырыу мөмкинлеген ҡарауҙы һораны. Тағы ла студенттарҙың республика вуздарына бюджет урындар һаны тураһындағы һорауына Радий Хәбиров һуңғы биш йылда урындар һанының 40 процентҡа артыуын белдерҙе. Осрашыуҙа ҡатнашыусылар республика Башлығының идара итеү командаһын нисек формалаштырыуы, уның алдына ниндәй бурыстар ҡуйыуы менән дә ҡыҙыҡһынды. – Мин кадрҙарҙы даими алыштырыуға ҡаршымын. Хакимиәттә һәм республика Хөкүмәтендәге кешеләрҙең 90 проценты төбәктең элекке етәкселәре менән бергә эшләгән. Күптәрҙең ҙур эш тәжрибәһе һәм тәрән белеме бар, – тип билдәләне Радий Хәбиров. – Ғөмүмән, төрлө кимәлдәге етәкселәрҙең ҡарарҙар ҡабул итеүҙә билдәле бер автономияһы булырға тейеш. Мин, мәҫәлән, муниципалитет башлыҡтарының башланғыстарын сикләмәйем, әммә уларҙан һөҙөмтә талап итәм. Осрашыу аҙағында республика Башлығы студенттарға асыҡ әңгәмә һәм әүҙем гражданлыҡ позицияһы өсөн рәхмәт белдерҙе. - Беҙ һеҙгә ихтирам һәм өмөт менән ҡарайбыҙ. Һеҙ бик әүҙем, ирекле йәштәр. Һеҙҙең яңы компетенцияларығыҙ күп, беҙ, өлкән быуын, уларға эйә түгелбеҙ, – тине Радий Хәбиров. – Һеҙ бик турбулентлы мәғлүмәт өлкәһендә йәшәйһегеҙ, заманса глобаль саҡырыуҙарға ҡаршы тора алыуығыҙға ышанабыҙ. Махсус хәрби операция беҙҙең йәштәребеҙҙең ниндәй батыр икәнен күрһәтте. Бөгөн һеҙҙең күп кенә йәштәштәрегеҙ Ватаныбыҙҙы һаҡлай. Беҙ һеҙҙең героик Рәсәй халҡының иң яҡшы сифаттарын йөрөтөүселәр булыуығыҙға инандыҡ. Фото: Башҡортостан Республикаһы Башлығының матбуғат хеҙмәтенән.