Հայ ռեժիսոր Շողակաթ Վարդանյանի «1489» ֆիլմը ճանաչվել է լավագույնը IDFA վավերագրական ֆիլմերի միջազգային փառատոնում Ամստերդամում, հայտնել են փառատոնի կազմակերպիչները Facebook-ում։
«1489»-ը մրցանակ է ստացել նաեւ Կինոմամուլի միջազգային ֆեդերացիայի (FIPRESCI) կողմից։ «Մեր մրցանակակիր ֆիլմը բացահայտում է մի սերնդի ձայնը, որն իրեն հանգիստ է զգում տեսախցիկի հետ, նույնիսկ ամենաինտիմ և խոցելի պահերին: Այն առաջին դեմքի տեսանկյունից անցում է կատարում դեպի լուռ դիտարկում, թե ինչպես են իրադարձությունները արձագանքում ռեժիսորի ընտանիքում»,- նշել է փառատոնի ժյուրին:
Վարդանյանի աշխատանքն իր ընտանիքի կողմից 2020 թվականի Արցախյան պատերազմի ժամանակ անհետ կորած եղբոր՝ Սողոմոնի որոնման մասին, ոչ միայն, ըստ ժյուրիի, «թույլ է տալիս բոլորին նայել այն բաներին, որոնք գերադասում են չտեսնել», այլ նաև «գործում է որպես ծակող լույս, որը ստիպում է տեսնել վշտի թաքնված ներքին լանդշաֆտը և շոշափելի ներկայություն է ստեղծում անտանելի բացակայությունից»:
Փառատոնը կանցկացվի նոյեմբերի 8-ից 19-ը Նիդեռլանդներում: