"Ағай, һине яратабыҙ!"

Ошо көндәрҙә Һуғыш һәм хеҙмәт ветерандары республика клиник дауаханаһының баш табибы Хәлил Мостафин күркәм юбилейын билдәләне. Ошо айҡанлы уның бер туған һеңлеһе Айгөл Хәкимйәнова социаль селтәрҙә матур һүҙҙәр яҙған. "Ни эшләптер беҙ үҙебеҙҙең иң-иң яҡындарыбыҙға күңелебеҙҙәге матур һүҙҙәрҙе әйтергә тартынабыҙ. Оялыумы ул, шулай тәрбиәләгәндәрме, аңлатыуы ҡыйын. Хәтеремдә, бала саҡта ағай-апайҙарымды исеме менән генә йөрөтөү ғәҙәткә инеп киткәйне. "Ағас тел! Ул бит һинең ағайың (апайың)!" - тип әрләргә кешеһе булмағандыр инде күрәһең. Әсәйем баҡыйлыҡҡа иртә күсте, атайым колхоз эшенән арманһыҙ булып ҡайтыр ине, оло йәштәге өләсәйем һигеҙ баланы ашатып-эсереп, өҫтөн йыуыуҙан бушамағандыр инде. Ошо көндәрҙә үҙенең оло юбилейын билдәләүсе Хәлил ағайым Мостафинды байрамы менән ҡотлап, әйтелмәгән матур һүҙҙәремде еткермәйенсә булдыра алмайым. Башҡортостанда ғына түгел, бөтә Рәсәйгә билдәле табип минең ағайым! Мин Хәлил ағайыма һәр саҡ: "Һин минең маяғым!"- тип әйтәм. Эйе, алға барыр дөрөҫ юлымды күрһәтеп, яҡтыртып тороусы маяғым! Өфөгә килеп, уҡып сығып төпләнеп китеүемдә лә уның өлөшө ҙур. Ул минең, беҙҙең ҙур ғаиләбеҙҙең, барлыҡ туғандарыбыҙҙың ныҡлы терәге, ғәҙел, талапсан (беҙгә генә түгел, үҙенә лә) булыуына ҡарамаҫтан, алдына ҡуйған маҡсаттарын тормошҡа ашырыу өсөн барлыҡ көсөн һала торған кеше. Хәлил ағай, барлыҡ эшләгән изгелектәрең, яҡшылыҡтарың үҙеңә меңләтә артып ҡайтһын! Һиңә ныҡлы һаулыҡ (кеше һаулығы менән бер рәттән, үҙеңдекен дә ҡарарға онотма!), бөтмәҫ-төкәнмәҫ бәхет, бәрәкәтле, мул тормош теләйбеҙ! Беҙ һине яратабыҙ, беҙ һине хөрмәт итәбеҙ, һинең менән ғорурланабыҙ!" Хәлил Мөжәүир улы 1963 йылдың 12 ноябрендә Белорет районының Әзекәй ауылында тыуған. Хәҙер уның һаулыҡ һаҡлау тармағында эшләүенә 30 йылдан ашыу. Армиянан ҡайтҡас, хеҙмәт юлын "Ашығыс ярҙам" хеҙмәтендә башлай. Өфө ҡалаһының Ленин, Киров райондарының "Ашығыс ярҙам" станцияларында тәжрибә туплай. Артабан тырыш, маҡсатлы ватандашыбыҙ медицина институтына уҡырға ингән. Республика клиник дауаханаһының реанимация бүлегендә медбрат булып та эшләгән, анестезиология һәм реанимация бүлегендә лә бай тәжрибә туплаған. 14 йәшенән тормошон ул медицина менән бәйләгән. Әйткәндәй, ул етәкселек иткән госпиталь республикала Бөйөк Ватан һуғышы йылдарынан алып эшләп килә, ул саҡта уҡ барыһы 940 кешене дауалау ҡаралған. Һуңғы ветерандар бик аҙ ҡалды, күбеһе 1-се, 2-се төркөм инвалидтары. Хәлил Мөжәүир улы етәкселек иткән медицина ойошмаһында шулай уҡ тыл ветерандарына ла медицина ярҙамы күрһәтелә. Улар, ҡабул ителгән план-графикҡа ярашлы, госпиталдә тейешле дауа ала, шуның өсөн дә госпиталь һаулыҡ һаҡлау өлкәһендә республика кимәлендәге иң әһәмиәтле дауалау учреждениеһы һанала. Хәлил Мөжәүир улына иҫәнлек-һаулыҡ, эшендә уңыштар һәм ғаилә именлеге теләйбеҙ! Фото: Новости (vk.com)