Өфө фән һәм технологиялар университеты “Берҙәм Рәсәй” партияһы башланғысы менән ойошторолған Бөтә Рәсәй “Рәсәй Конституцияһына 30 йыл - үҙеңде тикшер!” онлайн-конкурсына ҡушылды. Акцияла иң әүҙем ҡатнашыусылар булып Өфө фән һәм технологиялар университетының Хоҡуҡ институты һәм Тарих һәм дәүләт идаралығы институты вәкилдәре торҙо. Мәҫәлән, “Юриспруденция” йүнәлешендәге 618 студент Рәсәй Конституцияһының төп положениеларын белеүгә онлайн-тест үтте һәм яҡшы һөҙөмтә күрһәтте. Онлайн-конкурста Өфө фән һәм технолгиялар университетының башҡа факультеттары һәм институттары вәкилдәре лә ҡатнашты. Мәҫәлән, буласаҡ IT -белгесе, Информатика, математика һәм робот техникаһы институтының өсөнсө курс студенты Руслан Әхмәҙиев тест үткәреүҙе ойоштороуҙың юғары кимәлдә булыуын билдәләне. - Мәсьәләләрҙе мобиль ҡоролмала, теләгән ваҡытта һәм теләгән урында үтергә мөмкин булыуы оҡшаны. Ун минут эсендә ун һорауға яуап биреп, һеҙ шунда уҡ һөҙөмтә һәм ҡатнашыу тураһында сертификат алаһығыҙ. Бик уңайлы! – тине ул. Әйткәндәй, конкурста ҡатнашыусылар араһында юғары уҡыу йортоноң сит ил студенттары ла бар. Мәҫәлән, Таха Әхмәт Самир Өфө фән һәм технологиялар университетына уҡырға Мысырҙан килгән. Рәсәй Конституцияһын ул әле өйрәнмәгән, әммә уның менән таныша башлаған. Рәсәй Федерацияһы Конституцияһының 30 йыллығына арналған конкурста Өфө дәүләт нефть техник университеты уҡытыусылары һәм хеҙмәткәрҙәре әүҙем ҡатнашты. Университет ректоры Вадим Захаров тәүгеләрҙән булып онлайн-тесҡа яуап бирҙе һәм иң күп балл йыйҙы – 10 балл. - Бөгөн йәштәрҙең Конституцияны өйрәнеүгә ҙур ҡыҙыҡһыныу күрһәтеүе ҡыуаныслы. Был хоҡуҡи белем биреү, үҙ хоҡуҡтарыңды һәм бурыстарыңды белеү, һинең Бөйөк Рәсәй гражданы булыуыңды аңлау, - тип уртаҡлашты ректор. Конкурс “Рәсәй Конституцияһына 30 йыл - үҙеңде тикшер!" сайтында онлайн рәүештә үтә – constitution.er.ru Унда 18 йәштән өлкән теләгән һәр кеше ҡатнаша ала. Ул 25 ноябренә тиклем бара. Фото: Өфө фән һәм технологиялар университетының матбуғат хеҙмәте.