Журналистарға Шәһит Хоҙайбирҙин премиялары тапшырылды

Бөгөн республика журналистикаһы донъяһында мөһим ваҡиға булды. 2023 йыл һөҙөмтәләре буйынса Башҡортостан журналистарының иң-иңдәре үҙҙәренең төп бүләген – Шәһит Хоҙайбирҙин исемендәге дәүләт премияһын алды. Быйыл абруйлы премияға 11 автор һәм өс ижади коллектив дәғүә итте. Комиссия ағзалары оҙаҡ ҡына бәхәсләшкәндән һуң өс еңеүсене билдәләне: бер яңғыҙ автор һәм ике коллектив. Улар менән һеҙҙе лә таныштырабыҙ: “Ағиҙел” журналының баш мөхәррире, билдәле яҙыусы Мөнир Ҡунафин – "Башҡортостан" гәзитендә баҫылған "Бер ғүмер етмәй икән" очеркы һәм "Ҡыҙарып сейә бешкән мәл ине" юл яҙмалары өсөн; “Благоварские вести” гәзите редакцияһының журналистар коллективы Лира Ғафарова, Айһылыу Хәсәнова һәм Эльвина Ғафарова – “Үҙебеҙҙекеләрҙе ташламайбыҙ” мәҡәләләр циклы өсөн; “Башҡортостан” телерадиокомпанияһының авторҙар коллективы "Тәмле. Беҙ бергә" милләт-ара проекты өсөн. Шәһит Хоҙайбирҙин исемендәге дәүләт премияһы — Башҡортостандың журналистика өлкәһендәге иң яҡшы ижади эштәргә йыл һайын бирелә торған премия. 1989 йылдың 8 апрелендә Башҡорт АССР-ының Журналистар союзы тарафынан булдырылған. 1996 йылда республиканың дәүләт наградаһы статусына күтәрелә. Әлегә тиклем уға 115 журналист лайыҡ булған. Быйыл премияны тапшырыу символик урында – Өфө ҡалаһындағы Шәһит Хоҙайбирҙиндың йорт-музейында үтте. Тап быйыл йорт-музейҙы төҙөкләндерҙеләр, хәҙер унда ошондай юғары кимәлдәге саралар үткәрергә була. Премияны Башҡортостан Республикаһы Башлығы Хакимиәте Етәксеһенең эске сәйәсәт буйынса беренсе урынбаҫары Урал Таһир улы Килсенбаев тапшырҙы. Шулай уҡ БР Матбуғат һәм киң мәғлүмәт саралары агентлығы етәксеһе урынбаҫары Марат Ғәзизов, мәҙәниәт министры урынбаҫары Илнур Мөхйәнов, БР Журналистар союзы рәйесе, “Башҡортостан” гәзитенең баш мөхәррире Вәдүт Исхаҡов, комиссия ағзалары, премияның элекке йылдарҙағы лауреаттары ҡатнашты. – Барығыҙҙы ла Башҡортостан Башлығы Радий Хәбиров исеменән сәләмләйем һәм еңеүселәрҙе ҡотлайым. Премия тапшырыу өсөн был йорт-музей осраҡлы һайланманы, бында ҙур ремонт яһалды, – тине Урал Таһир улы. – Һуңғы ваҡытта беҙ еңел булмаған осорҙа йәшәйбеҙ. Тәүҙә пандемия һынаны, тик журналистар юғалып ҡалманы, “ҡыҙыл зона”ларҙа эшләне, ваҡытында мәғлүмәт еткереп торҙо. 2022 йылдың феврале бөтөнләй күпте үҙгәртте. Һеҙҙе, журналистарҙы, “һелкетте”. Тәүге осорҙа интернет киңлегендә бик ҙур һөжүм башланды, беҙҙең халыҡҡа дөрҫ булмаған мәғлүмәт еткерергә тырыштылар. Әммә республика журналистары үҙ эшен белә, улар лайыҡлы эшләне, халыҡҡа тик дөрөҫ мәғлүмәт еткерҙе. Әле лә ҡайһы берәүҙәр алғы һыҙыҡта яугирҙәр менән бергә, беҙгә ысынбарлыҡты күрһәтә. Урал Килсенбаев республикала журналистарға айырым ҡараш булыуы, уларға ярҙам күрһәтелеүе тураһында әйтте. Бында Башҡортостан Башлығы Радий Хәбиров булдырған премиялар, гранттар инә. Әйткәндәй, киләһе йылдан Шәһит Хоҙайбирҙин премияһының күләме биш тапҡырға артып, 500 мең һум тәшкил итәсәк. – Бындай иғтибар эҙһеҙ үтмәҫ тип уйлайым. Был эшләп йөрөгән журналистарға ҙур ярҙам булһа, икенсе яҡтан һөнәргә йәштәрҙе йәлеп итеү мөмкинлеге лә, – тине ул. – Ә быйылғы еңеүселәрҙе ихлас ҡотлайым. Премия яңы ижади үрҙәргә ҡанат ҡуйһын! Бүләкләнгән журналистар үҙҙәренең проекттары тураһында һөйләне, ярҙам һәм иғтибар өсөн республика етәкселегенә рәхмәт әйтте. Сара һуңында килгән бөтә ҡунаҡтар музей ихатаһындағы Шәһит Хоҙайбирҙин бюсына сәскә һалды. Ә хәҙер һүҙ быйылғы еңеүселәргә. Мөнир ҠУНАФИН,”Ағиҙел” журналының баш мөхәррире, яҙыусы: – Яҡташыбыҙ сая Фәнис Хөсәйенов тураһындағы очерк уҡыусылар араһында бик ҙур уңыш яуланы, интернетта ғына ла уны биш миллиондан ашыу кеше уҡыны. Сөнки ул – ысын халыҡ геройы тураһында! Фәнистең әсәһе Фәриҙә Мәғдән ҡыҙы менән һөйләшкәндә, моғайын, һеҙ улығыҙҙың махсус хәрби операцияға барыуына ҡаршы булғанһығыҙҙыр, тип һораным. Ул былай тип яуап бирҙе: “Ноябрҙә, һуңғы ялынан һуң кире китер сағында, барма, аяғыңды һындырам, тинем. Ә ул миңә: “Мин – ир кеше, һеҙҙе яҡларға тейешмен, инәкәй. Аяғым һынып диванда ятһам да, күңелем менән унда буласаҡмын”, – тип яуап биргән. “Күңелем менән унда булам” – иҫ киткес яуап бит был. Ысын ир-егет һүҙе. Быйыл йәй башҡорт журналистары менән МХО-ла булдыҡ. Нисек кенә сәйер булмаһын, миңә унда оҡшаны. Юғары хәрби рух, ирҙәрсә, ағайҙарса аныҡ дуҫлыҡ, шундай асыҡ, тәбиғи мөнәсәбәттәр... Блиндаждарҙа, окоптарҙа булдыҡ, тәүге линияла йоҡланыҡ, бергә ашаныҡ. Егеттәр үҙ яҙмышы тураһында һөйләне, иланы. Күңелдә ауыр... Улар барыһы ла беҙҙекеләр, туғандар, яҡындар. Беҙ – республика ла, Рәсәй ҙә уларҙы ташламаҫын беләләр, ныҡлы ышаналар. Улар – ысын патриоттар. Беҙ бөтәбеҙ ҙә Тыуған илебеҙҙе яратабыҙ. Ошоноң менән көслөбөҙ. Һәм беҙ еңәсәкбеҙ! Яҙыусылыҡ, журналист булыу – Хоҙай бүләге, Хоҙай ҡөҙрәтенән! Ана шул хеҙмәт кешеһенең хөрмәте, ҡәләм ҡөҙрәте, һүҙ көсө һәр заманда ла дөрөҫлөктә һәм бейеклектә булһын! Форсаттан файҙаланып, очерктарымды баҫтырған, мине премияға тәҡдим иткән “Башҡортостан” гәзитенә рәхмәт белдерәм. Наил ЮНЫСОВ, “Тәмле” тапшырыуҙары етәксеһе: – Беҙҙең проект классик гастрономик та, бөтөнләй трэвел-тапшырыу ҙа түгел. Ул – Башҡортостандың берҙәм халыҡтарының мәҙәни коды тураһында. Беҙ төрлө телдәрҙә яңы һүҙҙәр өйрәндек, республика район һәм ҡалаларының киң билдәле булмаған үҙенсәлекле урындарын күрһәттек, оҫталар менән таныштыҡ һәм, әлбиттә, милли аш-һыу әҙерләнек. Башҡа төбәктәрҙән хеҙмәттәштәребеҙ әйтеүенсә, улар “Тәмле”не ҡарап, Башҡортостан тураһында бик күп яңы һәм ҡыҙыҡлы мәғлүмәт белгән. Проекттың тағы бер үҙенсәлеге шунда: унда ике дәүләт теле – башҡорт һәм рус телдәре, шулай уҡ тағы бер халыҡтың теле яңғыраны. Күп теллелеккә ҡарамай, бөтәһе лә бер-береһен аңланы. Командабыҙ бик көслө белгестәрҙән тора, улар оҙаҡ йылдар Башҡортостан юлдаш телевидениеһында эшләй. Милләт-ара проектты күп милләтле, берҙәм команда әҙерләне. Ул бер-береңде ихтирам итеү, аңлау, бергә дуҫ һәм татыу йәшәү тураһында. Милләт-ара низағтар бер-берең тураһында белмәүҙән килеп сыға. Бер нимәгә ҡарамай, милләт-ара контент кәрәк һәм мөһим. Һәм беҙҙең “Тәмле. Беҙ бергә” проекты ошо мөһим ҡиммәттәрҙе кешеләргә алып етә алды тип иҫәпләйбеҙ. Әйткәндәй, был эште Ҡазанда үткән “Күп йөҙлө Рәсәй” Бөтә Рәсәй журналистар конкурсында ла юғары баһаланылар, 820 эш араһында беренсе урын яулап ҡайттыҡ. Лира ҒАФАРОВА, “Благоварские вести” гәзитенең баш мөхәррире: – Лауреат исеме – аванс һәм яуаплылыҡ. Был "Благоварские вести” редакцияһының бөтә командаһы эшенә баһа. Беҙ күпме эшләргә кәрәклеген, алда ниндәй ҙур бурыстар торғанын бик яҡшы аңлайбыҙ. Гәзитебеҙҙә “Үҙебеҙҙекеләрҙе ташламайбыҙ” тигән рубрика асылды. Журналистар барлыҡ ваҡиғалар үҙәгендә тора, яугирҙәребеҙ һәм уларҙың ғаиләләре проблемаларын яҡтырта. Яугирҙәр менән бәйләнештә торабыҙ, уларҙы редакцияға даими саҡырабыҙ, ялға ҡайтҡандарҙы ҡаршы алабыҙ. Яңы ғаилә тыуған саҡта шаһит булабыҙ. Гуманитар йөк ебәрәбеҙ. Һуңғы йылдарҙа республикала киң матбуғат саралары проблемаларына ҙур иғтибар бирелеүе эшкә дәрт өҫтәй: гранттар раҫлана, “Медиайыйын”, “Журфест”тар үткәрелә. Ә лауреат исемен биреү – яңы ҡыҙыҡлы проекттар башлау өсөн бына тигән мөмкинлек. Вәдүт ИСХАҠОВ, Башҡортостан Журналистары союзы рәйесе, “Башҡортостан” гәзитенең баш мөхәррире: – Шәһит Хоҙайбирҙин исемендәге дәүләт премияһы – журналистар өсөн бик ҙур бүләк. Һәр бер журналист күңелендә ошо исемде алырға хыяллана. Ниндәй генә бүләк булһа ла, уны бөтәһе лә алып бөтә алмай, әлбиттә. Үҙенең һөнәрендә юғары уңыштарға өлгәшкән журналистар ғына лайыҡ була. Быйыл башҡа йылдағылар менән сағыштырғанда премияны күберәк кеше алды: араларында ике коллектив булыуын иҫәпкә алһаҡ, йәмғеһе 12 кеше. Мин улар араһында Мөнир Ҡунафинға туҡталып киткем килә. Уның бөгөн донъялағы иң аяуһыҙ ваҡиғаларға бәйле яҙылған очерктары айырым баһаға лайыҡ тип иҫпләйем. Ул халыҡ геройына әйләнгән сая Фәнис һәм йәй көнө махсус хәрби операция биләмәһенә барып, барыһын да үҙ күҙҙәре менән күреп яҙған “Ҡыҙарып сейә бешкән мәл ине” очерктары өсөн премияға лайыҡ булды. Мөнир Сәхиулла улы һалдаттар менән бергә йәшәне, бутҡа ашаны, йәшәйештәрен күрҙе. Бында иң мөһиме уның бик оҫта итеп Бөйөк Ватан һуғышы геройҙары менән бөгөнгө МХО егеттәре араһында булған бәйләнеште күрһәтеүе булғандыр. Уның ике очеркын да республиканың төп милли баҫмаһы – беҙҙең “Башҡортостан”да беренсе баҫтырыу ике яҡ өсөн дә мөһим булды. Комиссия ағзалары уның әҫәрҙәрен бер тауыштан хупланы, был юғары оҫталыҡ тураһында һөйләй. Премияға килгәндә, уның абруйы йылдан-йыл арта. Киләһе йылдан Башҡортостан Башлығы указына ярашлы уның күләме биш тапҡырға артып, 500 мең һум тәшкил итәсәк. Ғөмүмән, Радий Хәбиров журналистарға, Журналистар союзына бик иғтибарлы, эштәрҙе үҙенең контролендә тота, беҙҙең тармаҡҡа төрлө яҡлап ярҙам итә. Ҙур рәхмәт уға. Фото: Валерий Шахов.