Бер кемде лә кәмһетергә теләмәйем, әммә...

Тәүҙә был мәҡәләне уҡып сыҡҡас, икеле уйҙар тыуҙы. Нишләп республикабыҙҙан гел етешһеҙлектәр эҙләгән кешегә ҡарата Азат Шамил улы асыҡтан-асыҡ яуап бирә, уның менән элек күрешеүе хаҡында бәйән итә?! Үҙен былай ҙа "Бөгөнгө көндөң Салауат Юлаевы" тип иҫәпләп һауаланған егеткә артыҡ мәртәбә бирә түгелме бындай яҙма?! Был тәү уҡыуҙан тыуған фекер ине. Ә бит Азат Бадранов хаҡлы. Ҡайһы берәүҙәр етәкселектең итәғәтлегенән файҙаланып (барыбер Хөкүмәттә шымып ҡаласаҡтар тип) артабан имеш-мимештәр һөйләп, халыҡты ҡужғытыуҙы дауам итә. Үҙен система ҡорбаны итеп күрһәтергә тырыша, үҙенән "милли герой" образы тыуҙырырға ынтыла, халыҡта власть вәкилдәренә ҡарата нәфрәтен уятыр өсөн сәбәп эҙләй. Ундай кешеләргә халыҡтың киләсәге мөһим түгел, улар үҫеш тураһында уйламай, илебеҙҙең киләсәге тураһында борсолмай, йәшәйешебеҙҙе яҡшы яҡҡа үҙгәртеү өсөн бер нимә лә эшләмәй. Бары уңайы тыуған һайын "хайп" эләктереү ниәте генә! Бына мин бер ҡасан да талашырға, әрләшергә яратмайым. Ныҡ асыуға тейһәләр ҙә, сөнки энергиямды кәрәкмәгән йүнәлешкә бороуҙан хафаланам. Һәм гел негатив эҙләү, талаш ойоштороу, үҙеңде күтәреү өсөн бөтәһен дә тәнҡитләү - насар ғәҙәт, ул тиҙ кешенең холҡона инә, йәшәү рәүешенә әүерелә. Бындай образдан кире сығыу бик ауыр, хатта мөмкин түгел. Бер кемде лә кәмһетергә теләмәйем, әммә тырнаҡ аҫтынан гел кер эҙләгән ҡайһы бер кешеләргә ошо хаҡта уйланырға кәрәктер. Булған көстө яҡшы ғәмәлдәргә йүнәлтеү тураһында уйланыр кәрәк. Ә инде мәҡәләнең асылына әйләнеп ҡайтһаҡ, бында төп фекер - халҡыбыҙҙың киләсәге хаҡында. Бында төп һүҙ, үҙен система ҡорбаны итеп иҫәпләгән егет хаҡында ла түгел. Ундай "революционерҙар" элек тә булған, хәҙер ҙә бар, киләсәктә лә буласаҡ. Тик улар булып тора, тиҙ онотолоп тора. Ә халыҡтың киләсәге хаҡында уйланыуҙар һәр ваҡытта ла көнүҙәк. "Башҡорт халҡы киләсәккә ниндәй статуста һәм ролдә аяҡ баҫасаҡ бөгөнгө көндә хәл ителә. Шул иҫәптән милләтселек менән бәхәстә. Төплө һәм киң белемле, байтаҡ профессиональ белгестәре булған халыҡ булырмы, әллә ҡара эштә йөрөгән һәм хеҙмәтләндереүсе өлкәләрҙә эшләгән халыҡ булырмы – уныһы үҙебеҙҙән тора. Аңыбыҙҙы томаларға бирәбеҙме, әллә мәғрифәт юлы менән китәбеҙме?! " - тип етди уйланырға саҡыра автор. Беләм, башҡорттар ҡыҙыу халыҡ: тәүҙә эшләй ҙә, аҙаҡ уйлай. Тик хәҙер заман башҡа, майҙанда ҡысҡырғандар түгел, ә кәңәшләшеп, белем аша алға барған милләттәр генә үҙен һаҡлап ҡала ала. Азат Бадрановтың мәҡәләһен ҡат-ҡат уҡып сығырға кәңәш итер инем, автор ҙа бит "мин халҡыбыҙҙың уйлана белгән өлөшөнә мөрәжәғәт итәм" тип яҙа. Ҡалғанын үҙегеҙ уйлағыҙ...Айгиз Баймөхәмәтов, Башҡортостан Яҙыусылар союзы рәйесе. Фото: Айгиз Баймухаметов (vk.com)