Махсус хәрби операция ветерандары ҡатнашасаҡ

Өфөлә “Ватан һаҡсылары кубогы” төбәк-ара комплекслы физкультура сараһы үткәрелә. Беренсе тапҡыр бындай ярыштар Кемеров өлкәһендә ойошторолған. Башҡортостан иһә ошондай сараны уҙғарасаҡ икенсе төбәк буласаҡ. “Башинформ” мәғлүмәт агентлығында ойошторолған матбуғат конференцияһында үрҙә әйтелгән сараға Рәсәйҙең Волга буйы һәм Урал федераль округтарының 20 төбәгенән йыйылма командалар киләсәк, тип билдәләнде. Шулай итеп, Башҡортостанда махсус хәрби операция ветерандары өсөн спорт турниры үткәрелә. Был сараға әҙерлек тураһында республика Хөкүмәте Премьер-министры урынбаҫары – финанс министры Лира Иғтисамова һәм “Ватан һаҡсылары” фондының Башҡортостан Республикаһындағы филиалы етәксеһе Гөлнур Ҡолһарина һөйләне. – Беҙҙең өсөн был – ҙур мәғәнәгә эйә спорт байрамы. Был кубок Рәсәй Президенты Владимир Путиндың башланғысы менән “Ватан һаҡсылары” дәүләт фонды булышлығында үткәрелә. Башҡортостан тап махсус хәрби операция ветерандары ҡатнашасаҡ икенсе майҙансыҡ булараҡ һайланды. Ҡыҙғанысҡа ҡаршы, улар хәрби бурысын үтәгәндә яраланған һәм әүҙем тормош алып барыуын дауам итә, рухи йәһәттән һынмай, - тип белдерҙе Лира Иғтисамова. Башҡортостан йыйылма командаһы составында 14 ветеран ҡатнашасаҡ. Улар араһында һөнәри спортсылар юҡ. Командала – үҙҙәре теләк белдергәндәр. Уларҙың сараға әҙерлеге өсөн республиканың Спорт министрлығы тарафынан урындарҙа күнекмәләр үткәреү өсөн барлыҡ шарттар булдырылған. Был аҙнала улар Өфөгә киләсәк һәм ярыштарға әҙерлекте дауам итәсәк. Махсус хәрби операция ветерандары өсөн ярыштар баш ҡалалағы Рима Баталова исемендәге Спорт әҙерлеге үҙәгендә үткәреләсәк. - “Ватан һаҡсылары кубогы” – спорттың адаптив төрҙәре буйынса программаға старт ул. Уға яугирҙәребеҙҙе, махсус хәрби операция ветерандарын, хәрби нөктәләрҙә ҡатнашҡан һаулыҡ мөмкинлектәре сикләнгәндәрҙе йәлеп итәсәкбеҙ. Был уларҙың үҙ-үҙҙәренә бикләнеп ҡалмауы, сәләмәт тормош алып барыуы һәм спорт менән шөғөлләнеүе өсөн кәрәк, - тип белдерҙе Гөлнур Ҡолһарина. Әйткәндәй, сара сиктәрендә ветерандар һәм махсус хәрби операцияла ҡатнашыусыларҙың ғаилә ағзалары өсөн илһөйәрлек фестивале була. 22 ноябрҙә Ауыл хужалығы министрлығының Колонналар залында “Геройҙар ваҡыты” түңәрәк өҫтәле үткәрелә. Сарала шулай уҡ Башҡортостанда махсус хәрби операцияла ҡатнашыусылар һәм уларҙың ғаилә ағзалары өсөн ярҙамдың 38 төрө булдырылыуы тураһында әйтелде. Мәҫәлән, федераль программаға ярашлы, 1 – 4-се класс уҡыусылары өсөн бушлай ашау ҡаралған. 11-се класс уҡыусылары һәм колледждар студенттары иһә, төбәк башланғысына ярашлы, ошондай уҡ хоҡуҡтан файҙалана. Лира Иғтисамованың хәбәр итеүенсә, махсус хәрби операцияла ҡатнашыусыларға күрһәтелгән ярҙамдың балаларға тәғәйенләнешлеһе бигерәк тә ҙур һорау менән файҙалана икән. Тағы улар уҡыу ваҡытында йәмәғәт транспортында бушлай йөрөү хоҡуғына эйә. Бынан тыш, санаторий йәки курортта һаулыҡты нығытыу тураһындағы һорау менән дә йыш мөрәжәғәт итәләр. Матбуғат конференцияһында “Ватан һаҡсылары” фондының Башҡортостан буйынса фондына махсус хәрби операцияла ҡатнашыусыларҙан һәм уларҙың ғаилә ағзаларынан туғыҙ меңдән ашыу мөрәжәғәт килгән. Уларҙың һигеҙ меңе хәл ителгән. Документтарҙы ла яугирҙәр фонд аша ала. Бынан тыш, психологик ярҙам күрһәтелә, медицина реабилитациялауы үткәрелә. Был хаҡта фондтың төбәк филиалы етәксеһе Гөлнур Ҡолһарина хәбәр итте. Автор фотолары.