15 ноябрҙә Мәскәүҙә, XVII «Рәсәй транспорты» халыҡ -ара форумы сиктәрендә, Рәсәй Хөкүмәте рәйесе урынбаҫары Марат Хөснуллин Башҡортостандың күргәҙмә стендында булды. Республика Башлығы Радий Хәбиров вице-премьерға төбәктең төп инфраструктура проекттары, шулай уҡ уларҙы тормошҡа ашырыу ваҡыты тураһында һөйләне. Транспорт объекттарында эштәрҙе ваҡытында финанслау һәм Башҡортостандың федераль үҙәк менән үҙ-ара килешеп эш итеү мәсьәләләрен дә тикшерҙеләр. – Иң мөһим проект - Өфөнән Көнсығыш сығыу юлын төҙөү, - тип билдәләне Радий Хәбиров журналистар менән әңгәмәлә. - Объектты тамамлау өсөн 2,5 миллиард һум аҡса кәрәк. Беҙ финанслауҙы тиҙләтеүҙе һораныҡ. Марат Шакирйән улы беҙҙе хупланы. Хәҙер был участкаға асфальт түшәлгән, юл билдәләрен һалабыҙ. Эштәрҙе 2024 йылдың ғинуар-февралендә тамамларға планлаштырабыҙ. Төбәк етәксеһе Башҡортостандың транспорт инфраструктураһын үҫтереүҙең башҡа мөһим проекттары тураһында ла һөйләне. – Фекер алышыуҙың төп темаһы - Р–240 Өфө-Ырымбур трассаһын яңыртыу. Стәрлетамаҡтан Ергәнгә тиклемге участкала транспорт ағымы бик тығыҙ, шуға күрә юлды дүрт һыҙатҡа тиклем киңәйтергә теләйбеҙ. Стәрлетамаҡ, Салауат, Ишембай ҡалаларында һәм төбәктәге башҡа тораҡ пункттарҙа йәшәүсе 500 меңдән ашыу кеше бының ыңғай тәьҫирен тоясаҡ, – тине Радий Хәбиров. - Бынан тыш, Бөрө – Таҙтүбә – Һатҡы автомобиль юлы төҙөлөшөн тамамлайбыҙ, М-5 һәм М-7 трассаларының үткәреү һәләтен арттырыуҙы дауам итәбеҙ. Дөйөм алғанда, Рәсәй Хөкүмәтенең йөкләмәләрен үтәйбеҙ һәм бөтә ҙур проекттар буйынса тигеҙ хәрәкәт итәбеҙ, – тине Радий Фәрит улы. Фото: glavarb.ru