Радий Хәбировҡа Сергей Лавровтан награда

15 ноябрҙә Мәскәүҙә Рәсәйҙең эске эштәр министры Сергей Лавров менән Башҡортостан Башлығы Радий Хәбиров осрашты. Көн тәртибендә – төбәктең тышҡы иҡтисади бәйләнештәрен үҫтереү. Федераль министр билдәләүенсә, республика илебеҙҙең дуҫ илдәр менән хеҙмәттәшлегенә ҙур өлөш индерә. – Халыҡ-ара саралар үткәреүгә матур мөмкинлектәр булдырғанығыҙҙҙы юғары баһалайбыҙ. Киләһе йылда үтәсәк Рәсәй һәм Ҡаҙағстандың төбәк-ара хеҙмәттәшлеге форумын юғары кимәлдә үткәрерһегеҙ тип ышанабыҙ. Беҙгә ярҙам иткән ЮНЕСКО эшмәкәрлегендә әүҙем ҡатнашыуығыҙҙы ла билдәләргә теләйем. Миңә ЮНЕСКО эштәре буйынса Рәсәйҙең Хөкүмәт Комиссияһына етәкселек итеү йөкмәтелгән. Шуға күрә был өлкәләге ҡаҙаныштарығыҙҙы яҡшы күрәбеҙ, – тине Сергей Лавров. Осрашыуҙа Сергей Лавров Радий Хәбировҡа “Халыҡ-ара хеҙмәттәшлеккә индергән өлөшө өсөн” түш билдәһен тапшырҙы. Радий Фәрит улы юғары баһа өсөн рәхмәт әйтте. Осрашыуҙан һуң Башҡортостан Башлығы журналистарҙың дуҫ илдәр менән хеҙмәттәшлеге тураһындағы һорауҙарына яуап бирҙе. – Беренсенән, Сергей Викторовичҡа награда өсөн рәхмәт әйттем. Был беҙҙең идара итеү командаһы, бөтә республиканың ҡаҙанышы. Беҙҙең тышҡы иҡтисади, социаль, гуманитар, мәҙәни, ғилми бәйләнештәрҙе үҫтереү буйынса тырышлыҡтар ыңғай һөҙөмтә бирә. Белорустар, төрөктәр, ҡаҙаҡтар, иран партнерҙары менән уртаҡ проекттар күп. Ҡытай Халыҡ республикаһы менән әүҙем эшләйбеҙ. Тышҡы иҡтисади бәйләнештәрһеҙ төбәктең үҫеше мөмкин түгел тип иҫәпләйем. Беҙҙең барыһы ла килеп сыға, тышҡы иҡтисади әйләнеш үҫә, – тине ул. Шулай уҡ Радий Фәрит улы туристик мөмкинлектәр тураһында, ЮНЕСКО эшмәкәрлеге тураһында һөйләне. Етәксенән ишеү слаломын үҫтереү мәсьәләһе тураһында ла һоранылар. – Сергей Лавров Рәсәй ишеү слаломының Попечителлек советы рәйесе булып тора. Был илдә үҫешкән спорт төрҙәренең береһе, ул бик популяр. Беҙҙең Алһыу Минһажева – Рәсәй чемпионы. Беҙ Өфөлә ишеү слаломы комплексын төҙөргә ҡарар иттек. Декабрҙә уның беренсе сираты әҙер була. Был киләһе йылдан уҡ юғары кимәлдәге ярыштар үткереү мөмкинлеге бирәсәк. Мин Сергей Викторовичты был объектты килеп күрергә саҡырҙым, – тине Радий Хәбиров. Фото: Башҡортостан Башлығы сайты.