Баҡалы районының Яңы Маты ауылында, “Һаулыҡ һаҡлау” милли проектының тәүге звеноны яңыртыу программаһына ярашлы, яңы модулле фельдшер-акушерлыҡ пункты асылды. Район хакимиәте башлығы Олег Ефимов, үҙәк район дауаханаһының баш табибы Зәбир Ғиздәтуллин, ауыл биләмәһе башлығы Татьяна Кудряшова ауылдаштарҙы тантаналы шарттарҙа яңы медицина учреждениеһының сафҡа индерелеүе менән ҡотланы. Бина бөтә тейешле стандарттарға яуап бирә, планлы, кисектергеһеҙ һәм ашығыс ярҙам күрһәтеү өсөн бөтә шарттар бар. Һыу һәм электр уты менән тәьмин итеү, канализация системалары үткәрелгән. Медицина пунктына юғары квалификациялы категорияға эйә фельдшер, ауыл биләмәһе депутаты Гөлнара Уршеева етәкселек итә. Ул Яңы Матыла утыҙ йылдан ашыу йәшәй һәм эшләй, ауылдаштарының абруйын ҡаҙанған. –Тәүге медик-санитария ярҙамын Яңы Маты, Ворсинка, Петровка һәм Красная Горка ауылдары халҡы аласаҡ. Йәмғеһе 246 кеше. Яңы модулле ФАП халыҡҡа сифатлы медицина ярҙамы мөмкинлектәренән файҙаланырға булышсаҡ, – тип билдәләне дауахананың баш табибы Зәбир Ғиздәтуллин. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.