Һәр әсәйҙең яратҡан гөл-сәскәһе бар. Кемдер – алһыу раузалар, кемдер ялан сәскәләрен оҡшата. Шул уҡ ваҡытта ошо гүзәл зат вәкилдәренең үҙҙәрен дә ниндәйҙер сәскә менән тиңләштерергә мөмкин. “Башҡортостан” гәзитенең “Бәйләнештә” төркөмөндә барған конкурста Салауат районы Комсомол ауылынан ҡатнашҡан Гөлшат Рафинат ҡыҙы Йомағужинаны иһә хас гөлйемеш кеүек сағыу, тау-таш араһында үҫкән умырзаялай ҡыйыу, тәүәккәл. Бынан тыш, ул тырыш, ныҡыш, маҡсатлы, әйткән һүҙендә торор, хатта ҡар өҫтөндә усаҡ яғыр ҡатын... Гөлшат Йомағужинаның төп байлығы, ғорурлығы – балалары. Улар тураһында һөйләгәндә уның күҙендә нурҙар сағылып киткәндәй. Биш бала әсәһе ул. Әле лә уңған әсәй бала сағындағы кеүек гөл-сәскәләр, төрлө йәшелсә-емеш үҫтерергә ярата. Уңған әсәнең өлкән ҡыҙы Гөлназ ире Илмир менән Янғантауҙа йәшәй. Ангелина, Оливия исемле сәскә кеүек ҡыҙҙар һәм батыр Ибраһимды тәрбиәләйҙәр. Ғаилә башлығы әле – махсус хәрби операцияла. Уның һәм башҡа ир-егеттәребеҙҙең имен-һау тыуған яҡтарына ҡайтыуын, донъяларҙың тиҙерәк тынысланыуын теләйек. Гөлшат Йомағужинаның икенсе ҡыҙы Римма Өфөлә йәшәй һәм эшләй. Улы Азат Тыуған ил алдындағы бурысын үтәп, әрме хеҙмәтендә булып ҡайтып, юл тармағында уңышлы ғына эшләп йөрөй. Алһыу менән Инсаф иһә Янғантау мәктәбендә белем ала. Улар – VI класс уҡыусылары. Ә тырыш әсә үҙе "Янғантау" шифаханаһында китапханасы булып эшләй. Әйткәндәй, бөгөн - Гөлшат Йомағужина өсөн бик матур көн. Биш бала әсәһенең бөгөн – тыуған көнө, хатта юбилейы. Уны ошо ғүмер байрамы менән ихлас ҡотлайбыҙ. Балалар, ейән-ейәнсәрҙәр бәхетенә төрөнөп, шатлыҡ-ҡыуаныста ғына йәшәүен теләйбеҙ. Хоҙай сәләмәтлектән айырмаһын, барлыҡ уй-ниәттәрең тормошҡа ашһын, күп балалы әсә! Салауат районы Комсомол ауылынан уңған әсәй Гөлшат Йомағужина өсөн да тауыш бирегеҙ, дуҫтар, лайктарығыҙҙы ла, комментарийҙарығыҙҙы ла йәлләмәгеҙ. Фотолар Гөлшат Йомағужинаның шәхси архивынан.