Баҡалы районының Яңы Балыҡлы ауылында, ”Һаулыҡ һаҡлау” милли проектының тәүге звеноны яңыртыу программаһына ярашлы, яңы фельдшер-акушерлыҡ пункты асылды. Ауылдаштарҙы әһәмиәтле ваҡиға менән ҡотларға Баҡалы үҙәк район дауаханаһының баш табибы Зәбир Ғиздәтуллин һәм район хакимиәте башлығы Олег Ефимов килде. Фельдшер-акушерлыҡ пункты Яңы Балыҡлы һәм Емеш-еләк ауылдары халҡын хеҙмәтләндерәсәк. 650 кешенең сәләмәтлеген 32 йыл хеҙмәт стажы булған фельдшер Жанна Үлмәсова хәстәрләйәсәк. Элек халыҡҡа тәүге медицина ярҙамы ауыл мәҙәниәт йорто бинаһында күрһәтелде. – Заманса йыһазландырылған медицина пунктында ауылдаштар диспансерлаштырыу үтә, вакцина яһата аласаҡ. Яңы бинаның файҙаланыуға тапшырылыуы айырыуса аҙ хәрәкәтләнеүсән һәм оло йәштәгеләр өсөн уңайлы, – тип билдәләне Зәбир Ғиздәтуллин. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото:Һаулыҡ һаҡлау министрлығы