Мәсетле районы башҡорттары төркөмөндә хәбәр итеүҙәренсә, төбәктә халыҡ йолаларын ҡәҙерләп һаҡлайҙар. Мәҫәлән, ошо көндәрҙә Һөләймән ауылында бик матур сара үткән. “Башҡорттар өсөн бауырһаҡ аҙыҡ-түлек кенә түгел, ә күпкә тәрәнерәк мәғәнәғә эйә. Күп кенә халыҡ йолалары нигеҙендә шул фекер ярылып ята. Мәҫәлән, борон-борондан йәш килен төшкән йортҡа килен күстәнәсе – бауырһаҡ килтереү йолаһы бар. Бауырһаҡтың ниндәй булыуынан сығып, киленде һынар булғандар. Ныҡ ваҡ икән: "Был ваҡсыл, һаран", – тигәндәр. Әгәр, киреһенсә, ныҡ эре булһа: "Ялҡауланып киҫкән", – тип һығымта яһағандар. Шуға күрә йәш киленсәк бауырһаҡты бер иш ҙурлыҡта ҡырҡырға тырышҡан. Аҙаҡтан ошо килен күстәнәсе менән ауылдың бар ҡатын-ҡыҙын йыйып, һыуға барып, килен сәйе үткәргәндәр. Килен сәйендә маҡтай- маҡтай бауырһаҡты тәмләгәндәр. Уҫалыраҡтары, төртмә телләнеп: "Әллә ярылып бешкәндәре лә бармы, ҡайҙа ҡарайым әле," – тип, әйткеләп тә алғылаған. Ошо ябай ғына йолаларҙа күп мәғәнә табырға була. Һәр кемдең холоҡ-фиғеле лә асыҡ сағыла. Һөләймән ауылы ағинәйҙәре боронғо йолаларҙы иҫкә төшөрөп, Әминә апайҙың йортонда бауырһаҡ бешерҙе. Рәзилә апай өйрәткән рецепт буйынса бауырһаҡ бик тәмле булды”, – тип яҙа һөләймәндәр. Әйткәндәй, был ауыл "Айыҡ ауыл" республика бәйгеһендә ҡатнаша. Фото: Мәсетле районы башҡорттары төркөмөнән.