Гөлназ һабын ҡайнатырға өйрәтә

Асҡын районының Билгеш ауылында йәшәгән Гөлназ Хөснуллинаны ауылдаштары ҡул эштәренә маһир зат тип белә. Нимәләр генә эшләй белмәй ул! Хуш еҫле һабындар, үҙенсәлекле брелоктар, исемле тән ышҡығыстар (мочалкалар), бәйләм әйберҙәре һ.б. Гөлназ – Ҡариҙел районы ҡыҙы. Тормош юлдашы Альберт Хөснимәрҙән улы менән ғаилә ҡороуҙарына 15 йыл тулған. Хөснуллиндарҙың татыу ғаиләһендә дүрт бала тәрбиәләнә: Илназ Өфөлә колледжда уҡый, Альбина, Гүзәл һәм Роберт – мәктәп уҡыусылары. Йәш ғаилә күпләп мал-тыуар, ҡош-ҡорт аҫрай. Әйткәндәй, Гөлназ Азат ҡыҙының ҡош үҫтереүгә ҡағылышлы бәләкәй генә ырымы ла бар: ул һәр бер төрҙө 11 итеп һатып ала. Мәҫәлән, быйыл да 11 ҡаҙ, 11 өйрәк, 11 күркә, 11 бройлер аҫраған, хатта кетәктәге тауыҡтары ла – 11. "Ниңәлер ошо һанды оҡшатам. Аллаға шөкөр, барыһын да теүәл итеп үҫтереп, һимертеп алабыҙ, ризыҡҡа яҙып тора", - ти хужабикә. – Һөт, май, ҡаймаҡ, йомортҡа – барыһы ла үҙебеҙҙең хужалыҡтан. Артығын һатып та ебәрәм. Тормош иптәшем Ҡубыяҙҙа “КамАЗ” водителе булып эшләй. Йорт эштәрендә, мал-тыуарҙы бағыуҙа балаларыбыҙ – ҙур ярҙамсы, – ти Гөлназ. Ҡул эштәренә оҫта Гөлназ быйылғы яҙҙа һабын ҡайнатыуға тотонған. “Интернеттағы видеояҙма буйынса эшләп ҡарағайным, беренсе тапҡырҙан уҡ килеп сыҡты”, – ти оҫтабикә. Әлеге ваҡытта ул, үҙмәшғүл булараҡ теркәлеп, заказдар ҡабул итә башлаған. Башлыса тәбиғи материалдарҙан яһалған, матур итеп биҙәлгән, күҙҙең яуын алырлыҡ һабындарҙы бүләккә тип һатып алалар. Был эштә өлкән ҡыҙы Альбина ла ярҙам итә. Гөлназ бәйләм менән дә булыша. Айырыуса синтетик ептән исемләп эшләгән тән ышҡығыстарға һорау ҙур икән. Быйыл билгештәр "Айыҡ ауыл" республика конкурсында ҡатнаша. Ошоға бәйле сараларға ярашлы, Гөлназ ауылдаштарына һабын ҡайнатыу буйынса оҫталыҡ дәресе уҙғарған. Бына шулай, белмәгән эштәрен үҙаллы өйрәнеп, белгәнен башҡалар менән дә ихлас уртаҡлашып йәшәй Билгеш оҫтабикәһе. Айрат Нурмөхәмәтов һәм Гөлназ Хөснуллинаның шәхси альбомынан фотолар.