Ярҙам тураһында мәғлүмәт һәр кемгә барып етергә тейеш

Хөкүмәттең оператив кәңәшмәһе һәр ваҡыттағыса уҙған аҙнаның мөһим ваҡиғаларын барлауҙан башланды һәм киләһе осорға яңы бурыстар ҡуйылды. Уҙған аҙнала Башҡортостан Хөкүмәте Премьер-министры Андрей Назаров етәкселегендәге республиканың рәсми делегацияһы Ҡытай Халыҡ Республикаһында булып ҡайтҡайны. Делегация составына ҙур компаниялар хеҙмәткәрҙәре, шулай уҡ бәләкәй һәм урта эшҡыуарлыҡ вәкилдәре инде. Улар Шанхай һәм Наньчан ҡалаларында булды. Башҡортостан Башлығы Радий Хәбиров фекеренсә, яҡын арала Ҡытай республикабыҙҙың иң төп тышҡы иҡтисади партнеры булып китә ала, сөнки хеҙмәттәшлек өсөн мөмкинлектәр сикһеҙ ҙур. Андрей Назаров белдереүенсә, Ҡытай - Башҡортостан өсөн төп партнер. Эйе, республика донъяның 112 иле менән хеҙмәттәшлек итә, ә бына Ҡытай өлөшөнә тышҡы сауҙа әйләнешенең 25 проценты тура килә. 8 ноябрҙә Башҡортостан 100-сө гуманитар ылау ебәрҙе. Унда республиканан махсус хәрби операцияға ҡатнашҡан мобилизацияланғандар һәм доброволецтар өсөн адреслы ярҙам тупланған ине. “Колоннала тиҫтәләгән ҙур машина бара. Аҙна һайын беҙҙән махсус хәрби операция биләмәһенә 20-30 йөк машинаһы китеп тора. Был йөктәрҙе булдырырға ярҙам иткән республика халҡына, барлыҡ ойошмаларға ҙур рәхмәт. Улар бик кәрәк. Егеттәрбеҙ посылкаларҙы көтөп ала”, – тине Радий Фәрит улы. Шулай уҡ етәксе вице-премьер – финанс министры Лира Иғтисамоваға махсус хәрби операцияла ҡатнашыусыларға һәм уларҙың ғаилә ағзаларына күрһәтелгән ярҙамдың һөҙөмтәлелеген, был турала мәғлүмәттең халыҡҡа нисек барып етеүен анализларға ҡушты. “Мин ғаиләләр менән осрашҡан саҡта, ҡайһы бер яугир ҡатындарының бөтә ярҙам саралары тураһында ла белмәүен ишетеп ҡалам. Тимәк, ентекләп еткермәйбеҙ. Муниципалитет башлыҡтары ла әҙерләнегеҙ, декабрҙә был мәсьәләне ныҡлап тикшерәсәкбеҙ”, – тине ул. Ошо көндәрҙә Башҡортостан Башлығы Радий Хәбиров журналистика тармағында “Дөрөҫлөк. Яуаплылыҡ. Ҡаһарманлыҡ” премияһын булдырыу тураһындағы указға ҡуйҙы. – Минеңсә, беҙҙең киң матбуғат саралары хеҙмәткәрҙәре, журналистар был премияла үҙ урынын үҙҙәре табыр. Унда, дөрөҫөн әйткәндә, эҙләргә лә кәрәк түгел, премияның исеме барыһы тураһында ла аныҡ әйтә. Алдаҡсылар, насар уйлы кешелә улар араһында булырға тейеш түгел. Һәр береһе 300-әр мең һумлыҡ 20 премия буласаҡ. Эште башлағыҙ, – тине ул. Һуңғы осорҙа Өфөлә йылы биреү мәсьәләһе буйынса ялыуҙар кәмегән. Был турала Башҡортостан Башлығының социаль коммуникациялар буйынса идаралығы етәксеһе Елена Прочаковская хәбәр итте. Уның белдереүенсә, айырым осраҡтар ғына ҡалған, дөйөм алғанда был өлкәлә барыһы ла тыныс. Уҙған аҙнаның тағы бер сағыу бер сараһы – Өфөлә уҙған Рәсәйҙең ҡатын-ҡыҙҙар араһында бокс буйынса чемпионаты. Унда Башҡортостаның йыйылма командаһы ике алтын, бер көмөш һәм бер бронза миҙал яулаған. “Был - һуңғы 30 йылдағы иң яҡшы күрһәткес. Эште ошо юҫыҡта дауам итәсәкбеҙ”, – тине был турала республиканың спорт министры Руслан Хәбибов. Бынан тыш, кәңәшмәлә өс ҙур доклад тыңланды. Республиканың эшҡыуарлыҡ һәм туризм министры Рөстәм Афзалов социаль һәм йәштәр эшҡыуарлығына күрһәтелгән грант ярҙамы төрҙәре тураһында һөйләне. Ғаилә, хеҙмәт һәм халыҡты социаль яҡлау министры Ленара Иванова республикала халыҡтың мәшғүллеге хеҙмәтен комплекслы яңыртыу эше хаҡында бәйән итте. Электән килгән йола буйынса, Хөкүмәт кәңәшмәләрендә республиканың ҙур предприятиелары етәкселәре сығыш яһай һәм эшмәкәрлектәре тураһында һөйләй. Был юлы “ИНМАН” акционерҙар йәмғиәтенең генераль директоры Виталий Пилацкий килде һәм үҙҙәре, етештерелгән тауарҙар, кадрҙар мәсьәләһе, үҫеш мөмкинлектәре тураһында мәғлүмәт бирҙе. Фото: Башинформ.