Күсейҙәр махсус хәрби операция биләмәһенә барҙы

Алдан хәбәр итеүебеҙсә, Баймаҡ районының Күсей ауылынан дүрт егет махсус хәрби операция биләмәһендәге ауылдаштарына һәм яҡташтарына гуманитар ылау алып киткәйне. Әле улар бараһы ерҙәренә имен-һау етеп, яугирҙәр менән осрашып, уларға посылкаларын тапшырып, кире тыуған яҡтарына ҡайтып килә. Ошо көндәрҙә Күсей ауылының дүрт ир-егете, тәүәккәлләп, "Ларгус" автомобилендә махсус хәрби операция биләмәһендә булған туғандары һәм ауылдаштары янына юлға сыҡты, уларға йылы кейем, башҡа кәрәк-яраҡ, ата-әсәләре, ҡатындары әҙерләгән күстәнәстәр, ауылдаштарының ҡайнар сәләмдәрен алып барып еткерҙе. Рөстәм Байназаров үҙенең автомобилендә Илназ Кинйәбаев, Рифат Баймөхәмәтов һәм Рушан Ишбирҙин менән меңәр саҡрым юл үтеп, Кременная ҡалаһы янындағы госпиталдә ауылдаштары менән осрашты. Был госпиталдә Иҫәнбәт ауылынан Дим исемле егет фельдшер булып эшләһә, Кременнаяға етмәҫ элек урынлашҡан госпиталдә Күсей ҡыҙы шәфҡәт туташы булараҡ яралы яугирҙәргә медицина ярҙамы күрһәтә. Бөгөн Күсей ауылынан ғына 12 кеше махсус хәрби операцияла ҡатнаша, уларҙың береһе – гүзәл зат. –Ике тәүлектә барып еттек, алдан уҡ ҡустыларҙың командирҙары менән һөйләшеү алып барҙыҡ. Украинаға тәүге тапҡыр барыуыбыҙ түгел, өсөнсөгә юл алдыҡ. Шуға күрә юлдағы хәлде лә, ундағы ҡағиҙәләрҙе лә яҡшы беләбеҙ. Ысынлап та, бында уяулыҡ та талап ителә, алыҫ һәм хәүефле юл үҙен һиҙҙермәй ҡалмай. Юлда яҡташ егеттәргә туҡталып, посылкаларын тапшыра барҙыҡ. Үҙебеҙҙең берҙән-бер һеңлекәште лә (яугирҙәр Гүзәлиәне хәҙер “үҙебеҙҙең һеңлекәш” тип атай) күреп, уның менән аралашыу мөмкинлеге булды. Аҡ халатлыларҙың минуты һәр саҡ һанаулы, ул тиҙ генә кире яралылар янына ашыҡты. Яугир ауылдаштар был юлы үҙҙәре Кременнаяға килде, алғы һыҙыҡтан тылға ялға йүнәлгән ваҡыттарына тура килтереп юлға сыҡҡан инек. Башҡа позициялағы ауылдаш егеттәр ҙә килә алды. Улар менән осрашып, ҡосаҡлашып, рәхәтләнеп аралаштыҡ. Ағай-ҡустыларҙы күреп, уларға тыуған яғыбыҙҙың ҡайнар сәләмдәрен, посылкаларҙы тапшыра алыуыбыҙға бик шатбыҙ. Иң мөһиме – уларҙың күңеле күтәрелде, күҙҙәрендә осҡондар балҡыны, һағыныу-һағыштары аҙға булһа ла кәмене. Бер аҙ олпатланып киткән ауылдаштарға иҫән-һау тыуған яҡтарына тиҙерәк әйләнеп ҡайтыуҙарын теләйбеҙ. Иң мөһиме – батыр яугирҙәребеҙ үҙҙәре ныҡ ҡыуанды, тыуған яҡҡа ҡайтып килгәндәй булдыҡ, тип барыһына ла сәләмдәрен еткереп, рәхмәттәр әйтеп ҡалды, – ти Рифат Баймөхәмәтов. Шулай уҡ Күсей егеттәре күрше Иҫәнбәт, Төркмән, Моҡас ауылдары һәм Сибай ҡалаһынан булған яугирҙәрҙең туғандарынан да посылкалар алып барған. Афарин, күсейҙәр! Ауыр ваҡытта ла үҙегеҙҙекеләрҙе ташламай, оҙон юл үтеп, бер нисә сәғәтлек осрашыу өсөн ашҡынып барыуығыҙ үҙе үк оло батырлыҡҡа тиң. Артабан да берҙәм булығыҙ, төрлө һынауҙарҙы бергә еңеп сығығыҙ. Махсус хәрби операцияла ҡатнашҡан барлыҡ яугирҙәрҙең дә тиҙерәк тыуған яҡтарына әйләнеп ҡайтыуын, ата-әсәләре, һөйгән йәрҙәре һәм балалары менән осрашыуын теләйбеҙ. Әйткәндәй, ошо көндәрҙә Күсей ауыл биләмәһе башлығы Мөхәмәт Әбсәләмов белдереүенсә, улдары, ирҙәре һәм ҡыҙҙары махсус хәрби операцияла булған ғаиләләргә утын алып барылған. Был изге эштә Күсей, Басай һәм Иҫәнбәт ауылы ир-егеттәре әүҙем ярҙамлашҡан. Ауыл халҡы дөйөм көс һәм берҙәмлек менән алғы һыҙыҡтағы яугирҙәргә лә, уларҙың иҫән-һау ҡайтыуҙарын өҙөлөп көткән ғаиләләренә лә бар яҡлап ярҙам күрһәтә, таяныс һәм терәк була. Тиҙерәк илебеҙҙә тыныслыҡ урынлашһын, барлыҡ ир-егеттәр имен-һау тыуған яҡтарына ҡайтһын, тигән изге теләктә ҡалабыҙ. Фото: Рифат Баймөхәмәтов.