Благовар районының Топоринка ауылында, “Һаулыҡ һаҡлау” милли проектының тәүге звеноһын яңыртыу программаһына ярашлы, яңы модулле фельдшер-акушерлыҡ пункты ҡалҡып сыҡты. Проекттың маҡсаты – йәшәү урынына яҡын ерҙә, халыҡ ихтыяжынан сығып, медицина ярҙамын ойоштороу.Әлеге ваҡытта медицина пункты эшмәкәрлеген лицензиялау буйынса тейешле процедуралар башҡарыла. Тәүге медик-санитар ярҙамды 294 кеше йәшәгән Топоринка халҡы аласаҡ. Заманса бинала пациенттарҙы фельдшер Алһыу Рыжова ҡабул итәсәк. Ул был ауылда 2013 йылдан алып эшләй. –Ауылда яңы заманса ФАП-тың төҙөлөүе – ҙур ваҡиға. Хәҙер пациенттар медицина ярҙамын уңайлы шарттарҙа аласаҡ. Яңы ҡорамалдар ваҡытында аныҡ диагноз ҡуйырға һәм дауалауҙы тиҙерәк башларға ярҙам итәсәк, – тип билдәләне Языков дауаханаһының баш табибы Алмас Заһиҙуллин. Рәсәй Президенты Владимир Путиндың “май“ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.