Белореттың "Добрый продукт" компанияһы кеүәҫен етештергәндә бөтәһе дүрт ингредиент - һыу, тоҙ, арыш сухарийҙары һәм шәкәр ҡуллана. Был ГОСТ нормалары буйынса эшләнгән, консерванттар өҫтәлмәгән тәбиғи кеүәҫ.
"Добрый продукт" яуаплылығы сикләнгән йәмғиәте 2022 йылдың февралендә "Белорет" йылдам үҫеш биләмәһе резиденты сифатында теркәлгән. Бинаны ремонтлауға, ҡорамалдар һатып алыуға күп көс һалынған...
Июндән бында "Боярское застолье" сауҙа маркаһы аҫтында "Домашний", "Окрошечный" кеүәҫтәрен етештереү менән шөғөлләнәләр. Быйыл компания тағы бер сауҙа маркаһын - "Боярский өҫтәл" маркаһын теркәгән.
Кеүәҫ һатыу географияһы - Стәрлетамаҡ-Күмертау территорияһынан тыш (унда урындағы етештереүселәрҙең конкуренцияһы юғары), бөтә Башҡортостан. Шулай уҡ Ырымбур, Силәбе, Магнитогорск, Ижевск ҡалаларының сауҙа кәштәләренә лә Белорет кеүәҫе ҡуйылған. "Добрый продукт" компанияһы продуктын "Магнит" селтәрендәге магазиндарҙа табырға мөмкин, “X5 Group ТС” (сауҙа селтәре "Пятёрочка") менән һөйләшеүҙәр алып барыла.
Кеүәҫ - миҙгелле продукт. Ә эшселәрҙең эш хаҡы һәм коммуналь хеҙмәттәр өсөн түләүҙәрҙе ҡыш һәм көҙөн бер кем дә юҡҡа сығармаған, шуға күрә миҙгелдән тыш бында минералдар менән байытылған таҙартылған эсер һыу сығарыу ойошторолған. Белорет районы предприятиеларына тәүге поставкалар башланған да инде.
Компания директоры Сергей Довольнов хәл ителмәгән мәсьәләләрҙең береһе тип кадрҙарҙың етешмәүен атай. Шулай уҡ майҙандарҙы киңәйтеү кәрәк. Хәҙерге 560 квадрат метр етерлек түгел.