Ҡурайҙа уйнап та, йырлап та көс һынаштылар

Баш ҡалабыҙҙа Әҙеһәм Исҡужин исемендәге VII асыҡ ҡала ҡурайсылар конкурсы булып уҙҙы. Ижади ярыш Әҙеһәм Исҡужин исемендәге Балалар сәнғәт мәктәбендә үтте һәм 50-нән ашыу ҡурайсыны үҙенә йыйҙы. Шарттар буйынса, 16 йәштән өлкәндәр категорияһында ҡатнашыусыларға инструменталь әҫәрҙәр уйнауҙан тыш оҙон халыҡ йырҙарын да башҡарырға кәрәк ине. Һәм гран-приҙы Силәбе өлкәһенән Рифат Исҡужин яуланы. Рифат Исҡужин Әбйәлил районында тыуып-үҫкән. Бөгөн Магнитогорск ҡалаһында йәшәй, металлургия комбинатында экскаватор машинисы булып эшләй. Камил Вәлиев исемендәге Сибай сәнғәт колледжының ҡурай класын тамамлаған. Йыр буйынса махсус белеме юҡ. Үҙенең әйтеүенсә, ҡурайҙа уйнарға һәм башҡорт халыҡ йырҙарын йырларға ярата. Был ҡурайсылар конкурсы – ярыш майҙансығы ғына түгел, ә оҫталыҡты камиллаштырыу мәктәбе лә. Ҡатнашыусыларҙы профессионалдар - Рәсәйҙең атҡаҙанған мәҙәниәт хеҙмәткәре, Башҡортостандың халыҡ артисы Юлай Ғәйнетдинов, Башҡортостандың атҡаҙанған мәҙәниәт хеҙмәткәре Әхиәт Ғәйетбаев, Башҡортостандың атҡаҙанған артисы Таһир Хәмитов, шулай уҡ уҙған йылдарҙа гран-при яулаусылар Иҙел Аралбаев һәм Шамил Күсәмишев баһаланы. Сарала еңеүселәр, Әҙеһәм Исҡужин исемендәге Балалар сәнғәт мәктәбенең “Тамъян” традицион инструменттар халыҡ оркестры һәм жюри ағзалары сығыш яһаны. Әйткәндәй,был конкурс Башҡортостан Республикаһының атҡаҙанған мәҙәниәт хеҙмәткәре, күренекле ҡурайсы-педагог, Башҡорт халҡының рухи мәҙәни мираҫын һаҡлауға һәм үҫтереүгә ҙур өлөш индергән халыҡ йырсыһы Әҙеһәм Исҡужиндың хәтерен мәңгеләштереүгә йүнәлтелгән. Ойоштороусылары: Өфө ҡала хакимиәтенең мәҙәниәт һәм сәнғәт буйынса идаралығы, Әҙеһәм Исҡужин исемендәге Балалар сәнғәт мәктәбе, Ҡала мәҙәни-ял итеү үҙәге, ойошторорға ярҙам итеүселәр: Республика халыҡ ижады үҙәге һәм Башҡортостандың Ҡурайсылар союзы. Фотолар: Өфө ҡала хакимиәтенең мәҙәниәт һәм сәнғәт буйынса идаралығының матбуғат хеҙмәтенән.