Ҡыҙҙарҙың күбеһе бәләкәйҙән йә уҡытыусы, йә табип, йә модель булырға хыяллана. Ә бына Борай ҡыҙы Эльвера мәктәп эскәмйәһенән бары мал табибы буласағын белә. Мәктәпте тамамлағас, Башҡортостан дәүләт аграр университетының ветеринарҙар әҙерләү факультетына уҡырға инә. 2021 йылда район ветеринария станцияһында ветеринария фельдшеры булып эш башлай, тип яҙа “Алға” гәзите. Һылыу, нескә күңелле ханымға был һорауҙы биреү урынлы кеүек: ”Эльвера, ни өсөн еңелерәк, ҡатын-ҡыҙ булмышына хасыраҡ һөнәр һайламаның?” “Бала сағымдан эт һәм бесәй балаларын ныҡ яраттым, урамда хужаһыҙ, тәрбиәһеҙ ҡалғандарын дауаларға, ашатырға, нисек тә ярҙам итергә тырыштым. Ғазап күрһәләр ҙә, йәшәргә тырышып ятҡан йән эйәләре күңелгә бик яҡын ине, шуға күрә ошо һөнәрҙе һайланым”,– ти Эльвера. Йәш белгес эшенә яуаплы ҡарашы менән коллективта хөрмәт ҡаҙанған. Сентябрь айында уны ветеринария-санитария экспертизаһы лабораторияһы мөдире итеп ҡуйғандар. Эльвера Фликс ҡыҙы иңенә ҙур мәшәҡәтле эштәр һалынған: бөтә ауыл хужалығы мал-тыуарын, үҫемлек һәм аҙыҡ-түлекте, ит һәм башҡа аҙыҡтарҙы даими тикшереү, һатыуға сығарыласаҡ продукттарҙың һаҡланыуын контролдә тотоу, һатыуға рөхсәт биреү, экспертиза дөрөҫлөгөн тикшереү һәм башҡа күҙгә күренмәгән әллә күпме эш... Тормош иптәше Себер тарафтарында вахта ысулы менән эшләгәнлектән, бөтә йорт мәшәҡәттәре, өс ҡыҙҙарын тәрбиәләү ҙә Эльвера Фликс ҡыҙы өҫтөндә. Әммә уның зарланырға, ауырлыҡтарға бирешергә уйы юҡ, сөнки яратҡан коллективы, татыу ғаиләһе уға көс-ҡеүәт, илһам бирә. Гөлназ Хужина фотоһы. Сығанаҡ: https://algaburaevo.ru/news/selskoe-khozyaystvo/2023-11-03/m-che-m-et-balalaryn-yaratkanga-3504677?utm_source=vk&utm_medium=social&utm_campaign=106614954