Өфөлә ҡатын-ҡыҙҙар араһында бокс буйынса ил чемпионаты үтте. БР Хөкүмәте Премьер-министры Андрей Назаров ошо турала фекерҙәрен уртаҡлашты. "Бөгөн ҡатын-ҡыҙҙар араһында бокс буйынса Рәсәй чемпионатының һуңғы көнө үтте. Иң яҡшыларҙы асыҡлау өсөн республиканың баш ҡалаһына Рәсәйҙең 49 төбәгенән 174 көслө спортсы килде. Һис шикһеҙ, турнир бөтә бокс һөйөүселәргә бүләк, иҫ киткес һәм мауыҡтырғыс ваҡиға булды. Римма Баталова исемендәге аренала бөтә ҡатнашыусылар ҙа иң юғары кимәлдә алыштар үткәрҙе. Спортсыларыбыҙ ышаныслы сығыш яһаны - беҙҙә бер юлы ике Рәсәй чемпионы бар! Илдең ғәмәлдәге чемпионы Азалия Әминева үҙенең статусын раҫланы һәм 66 килограмм ауырлыҡ үлсәмендә "алтын" яуланы. Юлия Чумгалакова 48 килограмм ауырлыҡ үлсәмендә иң яҡшыһы булды, Надежда Голубева - көмөш, ә Зенфира Магомедалиева - бронза призер. Матур сығыштарығыҙ өсөн рәхмәт! Башҡортостандың Бокс федерацияһы президенты булараҡ, балалар-үҫмерҙәр боксын һәм юғары ҡаҙаныштар спортын үҫтереү өсөн шарттар булдырыу буйынса планлы эште дауам итәсәкбеҙ, тип вәғәҙә бирәм. Бөтә республикабыҙ биләмәһендә был төр ярыштарға ҡыҙыҡһыныуҙы нығытасаҡбыҙ. Шулай уҡ беҙҙә мотлаҡ рәүештә тағы ла бер заманса спорт комплексы - Бокс прогрессы үҙәге буласаҡ. Киләһе ярыштарҙа уҡ төҙөлөшкә старт бирәсәкбеҙ. Башҡортостан Рәсәйҙә спорт баш ҡалаһы булырға ынтыла, һәм беҙ бының өсөн барыһын да эшләйәсәкбеҙ!" - тип яҙған ул социаль селтәрҙәге сәхифәләрендә. Сығанаҡ: https://vk.com/agnazarov?w=wall555400080_9585