Нефтекама ҡалаһында Башҡортостандың Һаулыҡ һаҡлау министрлығының күсмә кәңәшмәһе үткәрелде. Унда быйылғы туғыҙ ай һөҙөмтәләренә йомғаҡ яһалды. Сара барышында Башҡортостандың һаулыҡ һаҡлау министры Айрат Рәхмәтуллин тармаҡтағы төп мәсьәләләрҙе билдәләне. Коллегия ултырышында министр урынбаҫарҙары, Нефтекама хакимиәте башлығы Эльдар Вәлидов, “Росздравнадзор”ҙың Башҡортостан буйынса идаралығы етәксеһе Динара Ғашимова, Мотлаҡ медицина страховкаһы фондының Башҡортостан буйынса төбәк бүлексәһе етәксеһе Юлия Кофанова, баш табиптар һәм медицина ойошмалары хеҙмәткәрҙәре ҡатнашты. Сара наградаларға лайыҡ булыусыларҙы бүләкләү менән башланды. Краснокама үҙәк район дауаханаһының фельдшер-акушерлыҡ пункты етәксеһе Рәлизә Латипова юғары һөнәри оҫталығы, намыҫлы хеҙмәте һәм Башҡортостандың һаулыҡ һаҡлау тармағына индергән тос өлөшө, шулай уҡ “Сәләмәт республика – сәләмәт төбөк” акцияһын үткәреүҙә әүҙем ҡатнашҡаны өсөн “Башҡортостан Республикаһының һаулыҡ һаҡлау отличнигы” тигән түшкә тағыла торған билдә менән наградланды. Башҡортостандың Һаулыҡ һаҡлау министрлығының маҡтау грамоталары менән Ҡалтасы үҙәк район дауаханаһы фельдшеры Людмила Валтиева, табип-терапевт Линария Иҙрисова, Үрге Тәтешле үҙәк район дауаханаһы шәфҡәт туташы Светлана Латипова һәм башҡалар бүләкләнде. Шулай уҡ бер төркөм хеҙмәт уңғандарына министрлыҡтың рәхмәт хаттары тапшырылды. Коллегияла ҡатнашыусыларға сәләм һүҙҙәре менән Башҡортостан Башлығы Хакимиәте етәксеһе Максим Забелин мөрәжәғәт итте. - Беҙгә ғорурланырға урын бар. Күп кенә төбәктәрҙән Башҡортостанға һаулыҡ һаҡлау өлкәһендәге тәжрибәне өйрәнергә киләләр. Һуңғы йылдарҙа беҙҙең эш, милли маҡсаттарҙы тормошҡа ашырыуға йүнәлтелгән проекттар һөҙөмтәһендә ыңғай үҙгәрештәр күҙәтелә. Йөрәк-ҡан тамырҙары һәм яман шеш сирҙәре менән көрәштәге уңыштар менән ғорурлана алабыҙ. Балалар һәм йөклө ҡатындар менән эштә ыңғай трендтар бар, - тип белдерҙе ул. Тыуғанда ғүмер оҙайлылығы быйыл сентябрҙә 73,26 йәш тәшкил иткән. Былтыр был күрһәткес 72,98 булған. Хеҙмәткә яраҡлылар араһында үлем, шул иҫәптән сабыйҙарҙың ғүмере өҙөлөүен ҡыҫҡартыу һөҙөмтәһендә артабан да көтөлгән ғүмер оҙайлылығы артыр, тип күҙаллана. Быйыл туғыҙ айҙа дөйөм үлем күрһәткестәре 3,3 процентҡа кәмегән. Башҡортостандың һаулыҡ һаҡлау министры республика һаулыҡ һаҡлау тармағының беренсел звеноһы үҫеше маҡсаттары тураһында ла һөйләне. Төп йүнәлештәр – медицина ярҙамынан файҙалана алыу, һанлы технологияларҙы ҡулланыу, халыҡтың сәләмәтлек мәсьәләләре йәһәтенән грамоталылығын арттырыу һәм башҡалар. - Алдыбыҙҙа – ике ҙур маҡсат. Ғүмер оҙайлылығын 78 йәшкә тиклем арттырыу һәм пациенттарҙың медицина ярҙамынан ҡәнәғәт ҡалыуы. Әгәр Башҡортостандың һаулыҡ һаҡлау командаһы менән берлектә эшебеҙгә ҡарата ҡарашты үҙгәртһәк, медицина ярҙамын күрһәтеү сифатын үҙгәртер яңы проекттарҙы сафҡа индерһәк, был күрһәткестәргә өлгәшә аласаҡбыҙ, - тине Айрат Рәхмәтуллин. Фото, сығанаҡ: health.bashkortostan.ru/presscenter/news/584289/