Өфөлә “Беҙҙең бренд” махсуслашҡан күргәҙмәһе асылды

Сараны асыу тантанаһында Башҡортостан Хөкүмәте Премьер-министры урынбаҫары — ауыл хужалығы министры Илшат Фәзрахманов, Ҡырғыҙстан Республикаһының агробизнесмендар ассоциацияһы президенты Әзизә Юлдашева, Рәсәй кооперация университеты ректоры, Ҡазан кооператив институты ректоры Алсу Нәбиева ҡатнашты. — Йыл һайын ноябрь айында Өфө-ЭКСПО күргәҙмәләр майҙансығында аҙыҡ-түлек етештереүселәрҙе йыя. Бөгөн биш йыл элек булған күргәҙмә менән айырманы асыҡ күрәбеҙ. Ул саҡта аҙыҡ-түлек етештереүселәр продукцияһын өс литрлыҡ банкаларҙа һәм пластик шешәләрҙә тәҡдим итте. Бөгөн беҙҙең крәҫтиән (фермер) хужалыҡтары һәм кооперативтар тауарҙарҙы заманса төргәктәрҙә тәҡдим итә. Уларҙың тауарҙын һатыу саралары дөрөҫ ҡоролған. Күргәҙмә тәү сиратта етештереүселәргә аралашыу мөмкинлеге бирә, бер нисә көн рәттән төрлө саралар, оҫталыҡ дәрестәре үтәсәк. «Беҙҙең бренд» — етештереүселәр һәм ҡулланыусылар өсөн осрашыу урыны. Баш ҡала халҡы һәм ҡунаҡтары күргәҙмәне шулай уҡ көтөп ала, сөнки үҙебеҙҙә етештерелгән тәмле, тәбиғи һәм сифатлы продукцияны тәмләп ҡарарға һәм һатып алырға мөмкин, — тип һыҙыҡ өҫтөнә алды Илшат Фәзрахманов. Әзизә Юлдашева үҙенең сәләмләүендә Рәсәй, Башҡортостан менән Ҡырғыҙстан Республикаһын күптән дуҫтарса мөнәсәбәттәр бәйләй тине. — Башҡортостан Республикаһы менән хеҙмәттәшлек итерлек һәм бер-беребеҙҙән өйрәнерлек нәмәләр бихисап. Күргәҙмәлә ҡатнашыуыма шатмын, киләһе йыл Ҡырғыҙстандан ҡатнашыу өсөн тағы ла күберәк компаниялар килтерәсәкбеҙ, – тине ул. «Беҙҙең бренд» күргәҙмәһе экспозицияһында Рәсәйҙең һәм Ҡаҙағстандың 11 төбәгенән 130 етештереүсеһе, төрлө йүнәлештә эш алып барған хужалыҡтар, сауҙа селтәрҙәре ҡатнашты. Башҡортостандың ауыл хужалығы ҡулланыусылар кооперативтары һәм хужалыҡтары продукцияһы айырым майҙансыҡта үҙ тауарын күрһәтте. Быйыл республиканың 32 районынан 58 ҡатнашыусы килде. Был ит һәм һөт ризыҡтары, икмәк-кондитер изделиелары, хәләл ризыҡтар, сәй, бал һәм башҡалар. «Беҙҙең бренд» күргәҙмәһе экспозицияһы ике залға бүленгән, беренсеһендә крәҫтиән (фермер) хужалыҡтарының продукцияһы булһа, икенсеһендә төбәктә танылыу яулаған эре етештереүселәрҙең продукцияһы тәҡдим ителде. Программа сиктәрендә Башҡортостандың ауыл хужалығы ҡулланыусылар кооперативтарының IV "Ауыл хужалығы хеҙмәттәшлеге: алға китеш" съезы үтәсәк. Шулай уҡ тармаҡтар буйынса түңәрәк өҫтәлдәрҙең эше ҡаралған. Белгестәр сифатлы хеҙмәтләндереүҙе үҫтереү һәм йәмәғәт туҡланыуы хәүефһеҙлеге өсөн кадрҙар әҙерләү, умартасылыҡты үҫтереү, рестораторҙар һәм фермерҙар араһында бәйләнеш булдырыу, хәләл продукцияны аттестациялау һәм башҡа көнүҙәк мәсьәләләр ҡараласаҡ. Күргәҙмә 25 ноябргә тиклем барасаҡ. Фотолар Башҡортостандың Ауыл хужалығы министрлығы сайтынан алынды.