Баймаҡ ҡалаһында йәшәгән уңған хужабикә, күп балалы әсә Гүзәл Мырҙаеваны күптәр аш-һыу бешереү оҫтаһы булараҡ белә. Шәхсән үҙем дә Гүзәлгә татлы бәлешкә заказ биргәнем бар, ысын мәғәнәһендә тәмле бешерә! Тормош-көнкүреш тураһында ҡыҙыҡлы яҙмалары менән дә ихлас уртаҡлаша Гүзәл. Бер һүҙ менән әйткәндә, теленән дә килә, ҡулынан да килә. Әле бына сираттағы татлы бәлешенең фотолары иғтибарҙы йәлеп итте. Интернеттағы рецепҡа ҡарап бешергән икән. "Ммм, ныҡ тәмле булды, әйкәйҙәрем. Һеҙ ҙә бешереп ҡарағыҙ", - тип яҙҙы оҫтабикә. Ышанабыҙ, ышанабыҙ. һеҙгә лә Гүзәл һынап ҡараған яңы бәлештең рецебын тәҡдим итәбеҙ. Шулай итеп, 3 йомортҡа һарыһына 2 аш ҡалағы шәкәр, бер семтем тоҙ, 2 аш ҡалағы ҡаймаҡ ҡушып болғарға. Иреү хәлдәге 90 грамм аҡ майҙы (магазинда һатылғандың ҡап яртыһы була инде) ҡушып, 1 балғалаҡ ҡамыр күперткес (разрыхлитель), самалап он өҫтәп йомшаҡ ҡына ҡамыр баҫырға. Ҡамырҙың бәләкәйерәк бер өлөшөн төңдырғыҡа ҡуйырға. Ҡалғанын табаға йәйеп (ҡул менән баҫһаң да йәйелә), һыуытҡысҡа ҡуйып торорға. Ул арала 500 грамм төшө алынған сейәгә 4 аш ҡалағы шәкәр, 2 аш ҡалағы кукуруз крахмалы ҡушып, талғын утта ҡуйырғансы ҡайнатырға. Артабан суфле әҙерләйбеҙ: 3 йомортҡа ағына 3 аш ҡалағы шәкәр, 1 балғалаҡ ванилле шәкәр ҡушып, миксер менән 5-8 минут туҡырға. Ап-аҡ ҡуйы масса килеп сыға. Ошоға 2 аш ҡалағы кукуруз крахмалы, 400 грамм кибет ҡаймағы ҡушып, миксер менән тағы 30-60 секунд туҡып алырға. Һыуытҡыстағы ҡамырҙы алып, иң тәүҙә сейәле ҡайнатманы һалырға, өҫтөнә суфле ҡатнашмаһын ҡойоп тигеҙләргә, иң аҙаҡтан туңдырғысҡа һалған ҡамырҙы ҡырғыс аша ҡырып һалырға. 170 градус эҫелектәге мейестә 45-50 минут бешерергә. Бешеп сыҡҡас, өҫтөнә шәкәр пудраһы һибергә мөмкин. Тәмлекәсте нисек кенә тиҙерәк ашағығыҙ килһә лә, һыуынғанын көтөгөҙ, юғиһә формаһы боҙолоп ҡуйыр. Аштарығыҙ тәмле булһын! Фотолар: Гүзәл Мырҙаеваның социаль селтәрҙәге сәхифәһенән (vk.com/murzaevaa)
