Ватанды һаҡлаусылар Кубогы
Башҡортостан “Ватанды һаҡлаусылар Кубогы” төбәк-ара комплекслы физик культура сараһын ҡабул итә. Унда Волга буйы һәм Урал федераль округынан махсус хәрби операцияла ҡатнашҡан 120 ветеран көс һынаша. Бөтәһе 20 төбәк вәкиле Өфөгә йыйылды. Спорт ярыштары Рима Баталова исемендәге Спорт әҙерлеге үҙәгендә үтә. Сараны асыу тантанаһынан Закир Шәрипов репортажы. Әбйәлил районынан Тимур Лоҡманов 19 йәшендә әрме сафтарына алына. Тәүҙә ул Алыҫ Көнсығышта пехотала хеҙмәт итә. Бер йылын тултырғас, йәш егет контракт төҙөй һәм күп тә үтмәй махсус хәрби операция башлана. Тимур тәүгеләрҙән булып яуға инә.Аяғын юғалтҡас Тимур Лоҡмановты өйөнә ҡайтаралар. Йәш егет тормош ауырлыҡтарынан ҡурҡмай, Өфөлә фатир һатып алған һәм спорт менән шөғөлләнә башлаған. “Ватанды һаҡлаусылар Кубогы” төбәк-ара комплекслы физик культура сараһында ул фехтование, пауэрлифтинг, волейбол һәм яндан уҡ атыу кеүек спорт төрҙәрендә үҙен һынап ҡарай. Өфөгә Волга буйы һәм Урал федераль округтарынан махсус хәрби операцияла ҡатнашҡан 120 ветеран йыйылды. Улар 6 спорт төрө — ҡоралдан атыу, армрестлинг, яндан уҡ атыу, пауэрлифтинг, өҫтәл теннисы буйынса көс һынаша, иҙәндә ултырып волейбол уйнай. Бынан тыш, спорт мастерҙары һәм тренерҙар, белгестәр яңы спортҡа килгән ветерандарға оҫталыҡ дәрестәре уҙғара. Сараны “Ватанды һаҡлаусылар” дәүләт фонды, Рәсәйҙең Паралимпиа комитеты, Башҡортостан хөкүмәте, Бөтә Рәсәй Терәк-хәрәкәт аппараты менән проблемалары булғандарҙың спорт федерацияһы, Рәсәй халыҡтары ассамблеяһы ярҙамында ойоштора. “Ватанды һаҡлаусылар Кубогы” төбәк-ара комплекслы физик культура сараһы “Спорт – тормош тәртибе” федераль проекты сиктәрендә уҙғарыла. Быға тиклем ул бер-нисә төбәктә үткән. Өфөгә Киров, Түбәнге Новгород, Ырымбур, Пенза, Һамар, Һарытау, Ульяновск, Ҡурған, Свердловск, Төмән, Силәбе өлкәләре, Марий Эл, Мордва, Удмурт, Сыуаш, Татарстан, Башҡортостан республикалары, Пермь крайынан, Ханты-Манси һәм Ямал-Ненец автономия округтарынан командалар килде. Спортсыларҙың барыһы ла тиерлек махсус хәрби операцияла яраланып ҡайтҡан. Уларҙың күбеһе шәхси компания составында алышҡан, әле тыныс тормошҡа өйрәнә һәм яраҡлаша. Спорт иһә яугирҙарға ярҙам итә. Рәсәй Президенты Указы менән илдә Ватанды һаҡлаусылар дәүләт фонды булдырылған. Уның филиалы Башҡортостанда ла уңышлы эшләп килә. Фондтың маҡсаты – хәрби операцияла булғандарға, яҡындарына, яраланып ҡайтҡандарҙың һәр береһенә булышлыҡ итеү. “Ватанды һаҡлаусылар Кубогы” төбәк-ара комплекслы физик культура сараһы сиктәрендә махсус хәрби операцияла ҡатнашыусылар ҡатнашлығында ижади фестиваль, семинарҙар, түңәрәк өҫтәлдәр ойошторола. Еңеүселәр иһә кисен билдәләнә һәм бүләкләү тантанаһы бөгөн Башҡортостан дәүләт концерт залында үтә. Проект оҙайлы йылдарға иҫәпләнгән. Махсус хәрби операция ветерандары ҡатнашлығында ошондай ярыштарҙы киләсәктә башҡа федераль округтарҙа уҙғарып, финалын да үткәрергә йыйыналар.
Смотрите видео
--------------------------
Присоединяйтесь к калалу Башкортостан 24 в Дзен и будьте в курсе всех последних новостей и событий, происходящих в Уфе и Башкирии!
Мы предлагаем Вам свежие выпуски передач производимые холдингом ГТРК «Башкортостан».