Ҡаһарманлығығыҙ менән һәммәһен дә илһамландыраһығыҙ

Башҡортостан Башлығы Хакимиәте етәксеһе Максим Забелин республика Башлығы Радий Хәбировтың сәләмен еткерҙе. – Тағы бер тапҡыр һеҙ яу яланында ғына түгел, көндәлек тормошта ла герой була алғанлыҡты раҫланығыҙ. Һеҙ йәнә беҙҙең өсөн, үҫеп килгән быуын, йәштәр өсөн өлгө булып тораһығыҙ. Ниндәй генә хәлдәр теркәлмәһен, һеҙ әүҙемһегеҙ, аралашыусанһығыҙ, яныбыҙҙаһығыҙ һәм ҡылған ҡаһарманлығығыҙ менән илһамландыраһығыҙ, - тип белдерҙе Максим Забелин. Тәүге ошондай уҡ ярыштар Себер федераль округында үткәрелгәйне. Башҡортостан иһә ошондай сараны ойошторған икенсе төбәк булды. Быға Башҡортостандың Паралимпия уйындарында ҡатнашыусылар ғына түгел, геройҙар тыуған төбәк булыуы ла йоғонто яһаған. Был хаҡта Рәсәйҙең Паралимпия когмитеты президенты, Рәсәйҙең атҡаҙанған тренеры Павел Рожков әйтте. – Башҡортостан геройҙарҙы лайыҡлы ҡабул итте. Башҡортостан Башлығы Радий Фәрит улы Хәбировҡа рәхмәт белдерәм. Беҙ күптән түгел уның менән Башҡортостан Башлығы ҡарамағындағы совет кәңәшмәһендә осрашҡайныҡ. Унда махсус хәрби операция ветерандарын Паралимпия хәрәкәтенә йәлеп итеү тураһында барҙы. Махсус хәрби операцияла ҡатнашыусыларҙы һауыҡтырыу, реабилитациялау һәм адаптациялау мәсьәләләрен үҙ эсенә алған килешеүгә ҡул ҡуйылды. Шулай уҡ яугирҙәрҙе физик реабилитациялау, адаптациялау буйынса эште ышанып тапшырған “Ватан һаҡсылары” дәүләт фондына рәхмәт белдерәм, – тине Павел Рожков. Әйткәндәй, бындай ярыштар федераль округтарҙа үткәреләсәк һәм аҙаҡ финалы ойоштороласаҡ. – Үҙ төбәгегеҙ исеменән сығыш яһау өсөн күнекмәләр үткәрергә ваҡыт бар әле. Был спорт саралары үҙегеҙгә ҡарата мөнәсәбәтте һеҙҙең илебеҙгә кәрәклекте күрһәтеү өсөн кәрәк, – тине “Ватан һаҡсылары” дәүләт фондының Күҙәтеүселәр советы ағзаһы, Рәсәй Геройы Алексей Романов. Махсус хәрби операцияла ҡатнашыусылар алдында илһөйәрлек йырҙары фестивалендә ҡатнашыусылар йырланы, башҡа коллективтар сығыш яһаны. Махсус хәрби операцияла ҡатнашыусылар ветерандарынан торған Башҡортостан командаһы беренсе урын яуланы. Уның капитаны Тимур Лоҡманов – Әбйәлил районының Әбдрәш ауылынан. Икенсе урында – Силәбе өлкәһе командаһы. Өсөнсөлә – Төмән өлкәһе вәкилдәре. Иң мөһиме, әлбиттә, махсус хәрби операция ветерандарының ҡатнашыуы ине. Уларҙың барыһы ла ысын геройҙар, илһөйәрҙәр, үҫеп килгән быуын вәкилдәре өсөн Тыуған илеңде яратыу, бер нимәгә ҡарамай, алға барыу өлгөһө. Автор фотолары.