Сифатлы йырҙар ҡайҙа?

Әлеге көндә йыр сәнғәтендә ниндәй хәлдәр күҙәтелә, күңелгә үтеп инер, һәр быуын тыңлаусыһының күңелен яулар, һүҙҙәре лә "йырлап" торған, көйө лә ҡолаҡҡа ятышлы йырҙар ҡайҙа булып бөттө? Был һорауҙар йәмғиәтебеҙҙең уйлы-фекерле вәкилдәрен күптән борсой, әленән-әле ошо турала социаль селтәрҙәрҙә бәхәстәр ҙә булып тора. Республикабыҙ халҡының яратҡан "Юлдаш" радиоһы коллективы ла ошо һорауҙарға яуап эҙләй. Коллегаларыбыҙ йырҙарҙың сифатына яуаплы ҡарай, башҡорт йырының кимәле ҡайтыш булмаһын өсөн үҙ йәһәтенән тырыша, эфирға сығарыр алдынан йырҙар буйынса профессиональ белгестәрҙе саҡырып кәңәшләшә. Тап ошо йәһәттән бөгөн "юлдаш"тар "Башҡортостан" дәүләт концерт залындағы конференциялар залына музыка сәнғәтенә туранан-тура ҡатнашы булған кешеләрҙе фекер алышырға йыйҙы. Улар араһында Башҡортостандың халыҡ артистары – йырсылар Әлфиә Юлсурина, Вилдан Яруллин, Рөстәм Ғиззәтуллин, билдәле актер Илдар Ғүмәров; музыка белгесе, Башҡортостандың атҡаҙанған сәнғәт эшмәкәре Миләүшә Иҙрисова, йәшерәк быуын йырсыларҙан Рөстәм Шаһыбалов, Иҙел Нурғәлин, өмөтлө йәш йырсы Арыҫлан Тимеров, "Юлдаш"тың музыкаль мөхәррире, Башҡортостандың атҡаҙанған сәнғәт эшмәкәре, көйҙәр авторы Риф Арыҫлан, популяр йырҙар авторы Зифа Нагаева, шағирә, яҙыусы Миләүшә Ҡаһарманова һәм башҡа бихисап ҡатнашыусы бар ине. Фекер алышыуҙы "Юлдаш" радиоһының баш мөхәррире Миләүшә Йәғәфәрова һәм продюсеры Илнур Рамаҙанов алып барҙы, "Теге өсәү" проектының алып барыусылары Йәмил Ишмөхәмәтов һәм Айбулат Сәсәнбаев ҡушылды. Бик ҡыҙыҡлы ла, урыны менән ҡыҙғаныс та булды һөйләшеү. Фекер алышыу барышында хатта шул асыҡланды: баҡтиһәң, беҙҙең йырсылар профессиональ шағирҙарға йыр һүҙҙәре яҙып биреүҙе һорап бөтөнләй мөрәжәғәт итмәй... Гөлфиә Аҙнағол ҡыҙы Юнысова "юлдаш"тарҙан килгән һорауға хат-сәләм юллаған һәм әгәр ҙә ки матур йыр һүҙҙәре ижад итеүҙе һораусылар булһа, уларҙың үтенесен кире ҡаҡмаҫы, ярҙам итергә әҙер булыуы тураһында белдергән. Халыҡ шағирының һүҙҙәрен Миләүшә Ҡаһарманова ла ҡеүәтләне. Ул йырсыларҙы яҙыусылар ойошмаһына мөрөжәғәт итергә саҡырҙы, унда ла эстрадабыҙҙы аһәңле, матур йырҙар менән байытыуға өлөш индереүгә ҡыуанып булышлыҡ ҡылырҙарын әйтте. Һүҙҙәре – бер, йыр йыр булһын өсөн килешле көйө лә кәрәк бит әле. Бына ошонда тағы бер мәсьәлә килеп тыуа: хәҙер башҡарыусылар күбеһе үҙе һүҙҙәрен, үҙе көйөн яҙа ла шул "әҫәр"ҙе тыңлаусыға тәҡдим итергә ашыға. Ҡайҙа бында сиктәр? Һәр көй яҙыусы үҙен композитор тип атарға хоҡуғы бармы?.. Һәм бында Миләүшә Иҙрисова меннә килешмәй булмай: композитор – ул ҙур дәрәжә! Композитор булыр өсөн композиция серҙәрен белергә кәрәк! Ысын мәғәнәһендә профессионал, үҙ эшенең оҫтаһы ул - композитор!.. Һөйләшеүҙе бында ғына тулыһынса яҙып та бөтөп булмаҫ. Күп һорауҙар асыҡ килеш ҡала, шуныһы хаҡ. Шуға ла "юлдаш"тар һөйләшеүҙе артабан эфирҙа ла дауам итергә тип ниәтләй. Башҡорт йыр сәнғәтенә битараф булмаған, "Зауыҡ" тигән төшөнсәне юғалтмаған дуҫтар, һеҙ ҙә фекерҙәрегеҙҙе яҙығыҙ! "Бәйләнештә"ге төркөмөбөҙҙәге ошо яҙма аҫтына комментарийҙар ҙа яҙып ҡалдырырға мөмкин. Йыр сәнғәтебеҙҙе бергәләп күтәрәйек! Рәүилә ҒАТАУЛЛИНА. Автор фотолары.