2023 йылдың 21 ноябренән 23-өнә тиклем Аҡмулла университетында эш сәфәре менән Ҡырғыҙстан делегацияһы килде. Улар “Рәсәй һәм Ҡырғыҙстандың мәғрифәт киңлеге” стратегик сессияһында ҡатнаша. Делегация составында юғары уҡыу йорттары ректорҙары, Ҡырғыҙстандың Мәғариф академияһы президенты, төбәк мәғариф департаменттары етәкселәре, мәктәп директорҙары бар. Ҡырғыҙстандан килгән ҡунаҡтар Аҡмулла университеты эшмәкәрлеге менән таныша һәм Рәсәй Федерацияһының Федераль дәүләт белем биреү стандартына, Башҡортостан Республикаһының Дәүләт милли стандартына ярашлы берлектәге Рәсәй-Ҡырғыҙстан мәктәптәре өсөн төп белем биреү программаһы проектын тикшерә. 22 ноябрҙә М.Аҡмулла исемендәге Башҡорт дәүләт педагогия университетында «Манас - Урал» кабинетын асыу тантанаһы үтте. Шулай уҡ Өфөләге А.Ш. Фәйзуллин исемендәге 39-сы гимназия менән Бишкәк ҡалаһындағы «Газпром Ҡырғыҙстан» мәктәбе араһында килешеүгә ҡул ҡуйылды. Килешеү сиктәрендә күп кенә проекттар тормошҡа ашырыласаҡ, тәү сиратта, уҡытыусыларҙы ғилми-методик яҡтан оҙатыу, квалификацияны күтәреү курстары, тикшеренеү эштәре һәм, әлбиттә, федераль төп дөйөм белем биреү программаларын индереү өсөн механизмдар әҙерләү ҡаралған. Делегация эшләгән көндәрҙә берлектәге Рәсәй – Ҡырғыҙстан илдәре өсөн төп белем биреү программаһын әҙерләү буйынса эшсе төркөмдәрҙең ултырышы уҙасаҡ, ҡунаҡтар Аҡмулла университетының институттарына һәм факультеттарына барасаҡ һәм асыҡ лекциялар уҡыясаҡ, юғары уҡыу йортонда белем алған ҡырғыҙ студенттары менән осрашыуҙар уҙасаҡ. Шулай уҡ ҡунаҡтар Өфөнөң 39-сы гимназияһына барасаҡ һәм юғары уҡыу йорттары араһында үткән «Студенттар балы»нда ҡатнашасаҡ. Белешмә өсөн: Рәсәй Федерацияһы Мәғариф министрлығы ҡушыуы буйынса, М. Аҡмулла исемендәге Башҡорт дәүләт педагогия университеты 2021 йылдан илдә дөйөм белем биреүҙең иң яҡшы тәжрибәһен Ҡырғыҙстан Республикаһында таратыу буйынса эш алып бара. Ҡырғыҙстанда туғыҙ мәктәп төҙөү буйынса проект старт алды, унда уҡытыу рус телендә алып барыласаҡ. Хәтерегеҙгә төшөрәбеҙ, 2023 йылдың 1 сентябрендә Рәсәй Президенты Владимир Путин һәм Ҡырғыҙстан Президенты Садыр Жапаров Бишкәк, Баткен һәм Ҡараҡалала өс мәктәп төҙөлөшөнә старт биргәйне. Фотолар: М. Аҡмулла исемендәге БДПУ-ның матбуғат хеҙмәте.