Андрей Назаров Төркиәнең Ҡазандағы Генераль консулы Уғыр Йылмаз менән осрашты

- Төркиә менән үҙ-ара эш итеүебеҙгә өс тиҫтә йыл самаһы ваҡыт үтте. Был ваҡыт эсендә иҡтисади, фәнни-техник һәм мәҙәни өлкәләрҙә кооперация буйынса ниәттәребеҙҙе хөкүмәт кимәлендә нығытҡан бер нисә мөһим килешеүгә ҡул ҡуйылды, - тип һөйләне Премьер-министр. Министрҙар кабинеты башлығы 2022 йылдың декабрендә Истанбулда Башҡортостан Республикаһы вәкиле эшлекле партнерҙар эҙләүҙе ябайлаштырыу, Башҡортостан һәм Төркиә компаниялары араһында хеҙмәттәшлек булдырыу өсөн эш башлауы хаҡында иҫкә төшөрҙө. Бер йылдан да кәмерәк ваҡыт эсендә уның ярҙамында республикала Төркиә партнерҙары ҡатнашлығында 3 уңышлы инвестиция проекты эшләй башланы. - Дөйөм алғанда, Башҡортостанда инвесторҙарҙың уңайлы эшләүе өсөн бөтә шарттар ҙа булдырылған. Шул уҡ ваҡытта беҙҙең компаниялар Төркиәлә перспективалы проекттарҙы тормошҡа ашырыуға әҙер булыуын белдерә. Мәҫәлән, Башҡортостандың «Метта» предприятиеһы ултырғыстар йыйыу производствоһын башланы. Проект буйынса инвестициялар күләме 3 миллион долларҙан ашыу тәшкил итә. Һис шикһеҙ, беҙҙең һәм Төркиә яғынан бындай перспективалы башланғыстар әүҙем ярҙамға мохтаж. Бында беҙ һеҙҙең ярҙамығыҙға ла иҫәп тотабыҙ, -тип мөрәжәғәт итте консулға премьер-министр. 2023 йылда Башҡортостан менән Төркиә араһында тауар әйләнешенең ике яҡлы үҫеше 81,5 процент самаһы тәшкил итә, тип билдәләне Уғыр Йылмаз. Төркиә инвесторҙары ике яҡлы сауҙа тауарҙары структураһын диверсификациялау һәм байытыу менән ҡыҙыҡһына. - Ике яҡлы сауҙа, туризм өлкәһендә, айырыуса медицина туризмы өлкәһендә ҙур потенциалыбыҙ бар тип иҫәпләйем. Был аҙыҡ-түлек тауарҙары, машиналар эшләү продукцияһы, механик приборҙар менән тәьмин итеүгә ҡағыла. Башҡортостан илебеҙгә минераль, нефть химияһы продукцияһын әүҙем экспортлай. Икенсенән, Башҡортостан сәнәғәт төбәге генә түгел, тәбиғәтең гүзәл төбәгендә урынлашҡан Башҡортостан. Беҙ һеҙҙең республиканың Төркиәлә үҙенең туристик потенциалын әүҙемерәк үҫтереүен теләйбеҙ. Быға ошондай форумдар ҙа ярҙам итә, әйткәндәй, Анкара, Мерсин, Эскишехир ҡалалары менән бер нисә туғандаш бәйләнеш бар. Был йүнәлештә лә ярҙам күрһәтергә әҙербеҙ, - тип һыҙыҡ өҫтөнә алды ул. Осрашыуҙа Төркиәнең рәсми һәм эшлекле делегацияһының 2024 йылғы инвестиция һабантуйына килеүе, БР Эшҡыуарлыҡ һәм туризм министрлығы менән Төркиәнең бәләкәй һәм урта эшҡыуарлыҡ субьекттарына ярҙам итеү Һәм үҫтереү ойошмаһы араһында хеҙмәттәшлек тураһында Меморандумға ҡул ҡуйыу, Төркиә етәкселегенең Өфөнөң 450 йыллығын байрам итеү буйынса сараларҙа ҡатнашыуы, Төркиәнең баш ҡалаһында Өфө көндәрен ойоштороуҙа булышлыҡ итеүе тикшерелде. Андрей Назаров шулай уҡ Истанбул-Өфө-Истанбул маршруты буйынса тура рейстар кәрәклеген билдәләне. Әлеге ваҡытта Росавиация линияһы буйынса бөтә килешеүҙәр алынған, Төркиә сит ил эштәре министрлығы яғынан ярҙам кәрәк. Шулай уҡ Уғыр Йылмазға Өфөнө федераль ике яҡлы саралар, атап әйткәндә, Рәсәй-Төркиә хөкүмәт-ара комиссияһының сираттағы ултырышын үткәреү өсөн майҙансыҡ сифатында ҡарарға тәҡдим ителде.