Башҡортостандың Дәүләт Йыйылышы – Ҡоролтай депутаттары металл һыныҡтары тапшырған өсөн ҡулаҡса менән иҫәпләшеүҙе тыйыу тураһында закон проекты әҙерләй. Был ни өсөн кәрәк? Хәҙер канализация ҡоҙоғо ҡапҡастарын, тимерҙән эшләнгән сүп-сар йыйыу һауыттарын, хатта зыяраттағы ҡәбер кәртәләрен һәм башҡа йәмәғәтселек әйберҙәрен урлап, металл һыныҡтары тапшырыу пункттарына тапшырыу йышайҙы. Сәбәбе: ошо пункттарҙың хужалары тапшырған тимер-томор өсөн ҡулаҡса менән иҫәпләшә. Тимәк, бурҙар ҙа бер ниндәй яза алмай (документтарҙа сағылыш тапмай бит), эшҡыуар ҙа күпмелер табышын һалым органдарынан йәшереп ҡалырға мөмкин. “Металл һыныҡтары йыйыу һәм эшкәртеү – иҡтисадтың мөһим секторҙарының береһе, сөнки ул сеймал биреп кенә ҡалмай, ә ҡалдыҡтарҙы эшкәртә лә, – ти парламент етәксеһе Константин Толкачев. – Шул уҡ ваҡытта уның үҫеше ҡулаҡсаның ҙур әйләнеше менән тотҡарлана: статистикаға ярашлы, был пункттарҙағы иҫәп-хисаптың биш проценты ғына ҡулаҡсаһыҙ башҡарыла. Металл һатыусыларға түләү өсөн компаниялар банктарҙан ҡулаҡсаны күп ала, был иһә күләгәләге бизнесты арттырыуға дәртләндерә. Металл һыныҡтары йыйыу ойошмалары сеймалды күберәк һатып алыу менән ҡыҙыҡһына, уның ҡайҙан алынғаны эшҡыуарҙы борсомай. Ә ҡулаҡсаһыҙ иҫәпләшкәндә һатып-алыу схемалары асыҡ күренәсәк. Фото: “Башинформ”.