“Баш РТС” хаҡлы түгел

Республика Арбитраж суды Торлаҡ һәм төҙөлөш күҙәтеүе буйынса дәүләт комитетының “Баш РТС” яуаплылығы сикләнгән йәмғиәтен административ яуаплылыҡҡа тарттырыу тураһындағы ҡарарын законлы тип тапты. Һүҙ бында йәмғиәт тарафынан Стәрлетамаҡ ҡалаһы, Братская урамы, 1А һанлы йорт адресы буйынса урынлашҡан күп ҡатлы йортта энергия һаҡлау һәм энергетик тәьҫирлелек тураһындағы законды боҙоуы тураһында бара. Тикшереү барышында дөйөм йорт йылылыҡ энергияһын иҫәпләү приборын тәү тапҡыр файҙаланыуға тапшырыу 2014 йылдың 12 декабрендә башҡарылған. Ошо ваҡыттан алып иҫәп приборы йыл да тикшереү үткән, коммерция иҫәбенә ҡуйылған. 2022 йылда йылылыҡ энергияһын иҫәпләү приборы тикшереү үтмәгән һәм коммерция иҫәбенә ҡуйылмаған. Сәбәбе – был эште башҡарыу буйынса комиссия ойошторолмауы һәм йылылыҡ осоро башланыу мәлендә күп ҡатлы йортҡа идара итеү ысулының һайланмаған булыуы. Дөйөм йорт энергетика ресурстарын иҫәпләү приборҙарын хеҙмәтләндереү һәм уларҙы ресурстар өсөн иҫәп-хисап эштәрен башҡарғанда ҡулланыу үҙенсәлеге №-261-ФЗ “Энергия һаҡлау һәм энергетик тәьҫирлелекте күтәреү тураһында һәм Рәсәй Федерацияһының айырым закон акттарына үҙгәрештәр индереү тураһында”ғы Федераль законға ярашлы башҡарыла. Үрҙә әйтелгән бәхәс тыуҙырған йортҡа ҡарата “Баш РТС” коммуналь хеҙмәттәр күрһәтеүсе булып иҫәпләнә, йылылыҡ өсөн хаҡтарҙы ул билдәләгән. Судтың аңлатмаһы буйынса, дөйөм йорт иҫәп приборы эшен тәьмин итеү бурысы идарасы ойошмаға ғына (был мәлдә идарасы ойошма булмай) ҡағылмай, шулай уҡ ресурс менән тәьмин итеүсе ойошма иңенә лә һалына. Суд, закон положениеларын иҫәпкә алып, ресурс менән тәьмин итеүсе ойошманың (№ 261-ФЗ Федераль закондың 13-сө статьяһының 12-се өлөшөнә ярашлы) талаптарҙы мотлаҡ үтәргә тейешлеген билдәләгән. Фото: БР Арбитраж суды.