Уҙған йылда сауҙа-иҡтисади мөнәсәбәттәр өлкәһендә Ҡытай Башҡортостандың төп партнеры булды. Ул Башҡортостан менән үҙ-ара эш иткән 112 сит ил дәүләте араһында беренсе урын алған. – Башҡортостанда Ҡытай капиталы менән туғыҙ компания эшләй. Беҙ Ҡытайҙа башҡорт тауарҙарын киң танытыу, шулай уҡ Ҡытайҙың Башҡортостанға инвестициялар алып килеүе менән ҡыҙыҡһынабыҙ, – тип билдәләне Андрей Назаров. 2018 йылда Пекин күргәҙмә үҙәге биләмәһендә ике ҡатлы “Рус йорто” павильоны – Рәсәй тауарҙарының демонстрация майҙансығы асылған. Башҡортостан етештереүселәре лә сауҙа йортонда һатыу һәм күрһәтеү өсөн үҙ продукцияһын ебәреүҙе ойошторорға әҙер. – Был идеяны хуплайбыҙ. Шулай уҡ беҙҙә Башҡортостан продукцияһын һатыу өсөн өҫтәмә әҙер каналдар бар, – тип тәҡдим итте Цун Жифан. Инвестициялар һалыуҙың перспективалы йүнәлештәренең береһе булып республикала туристик инфраструктура төҙөү тора. Был өлкәлә ҙур потенциал бар: Башҡортостан үҙенең үҙенсәлекле тәбиғәте менән дан тота. Был тәҡдимде шулай уҡ Цун Жифан да хупланы. Башҡортостан Республикаһы Хөкүмәте Рәйесе Андрей Назаров Ҡытайға эш сәфәре тураһында социаль селтәрҙәрҙә былай тиеп яҙған: “Ҡытай бик тиҙ үҫешә, масштабы һәм технологиялары һоҡландыра. Бөгөнгө геосәйәси шарттарҙа улар беҙҙең өсөн төп партнер булып тора, шуға күрә беҙ ҙур делегация менән килдек. Күп кенә Ҡытай партнерҙары Башҡортостандың географик йәһәттән уңайлы урында – Европа менән Азияның тоташҡан ерендә – урынлашыуын белеп ғәжәпләнде, хеҙмәттәшлек мөмкинлектәре менән ҡыҙыҡһынды, республикаға килергә ниәтләүҙәрен раҫланы. Тәүге һөҙөмтәләр ҙә бар: “СТАН” компанияһы, ЧПУ менән станоктар етештереүсе Ухань предприятиеһы менән килешеү төҙөлдө. Киләһе йылдың яҙында Республика Башлығы Радий Фәрит улы Хәбиров етәкселегендәге Башҡортостан делегацияһының ҙур эш сәфәренә әҙерләнәбеҙ, Пекинда беҙҙең төбәктең күләмлерәк презентацияһын үткәрәсәкбеҙ. Ошо ваҡытҡа тиклем Ҡытай капиталы ҡатнашлығындағы предприятиелар һанын арттырырбыҙ һәм хеҙмәттәшлектең яңы формаларын асырбыҙ, тип ышанам”, – тигән ул. Фото: pravitelstvorb.ru