Межгорье ҡалаһының Көньяҡ-Көнбайыш биҫтәһендә яңы дарыухана пункты эш башланы. Уны асыу проекты менән эшҡыуар урындағы хакимиәттә “Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү” милли проекты маҡсаттарын тормошҡа ашырыу өсөн үткәрелгән “Эшҡыуарлыҡ сәғәте”нә мөрәжәғәт иткән ине. Проектты башлаусы – Межгорьела йәшәгән Татьяна. Ул үҙе провизор һәм дарыухана бизнесын яҡшы белә. Хакимиәткә шәхси эшен асырға ниәтләнгән кеше булараҡ мөрәжәғәт иткән. Уйлағанын тормошҡа ашырыу өсөн уға бина талап ителә. Хакимиәттә был мәсьәләне өйрәнгәндәр, яңы дарыухана пункты өсөн Ильмяшевская, 9 адресы буйынса урын табалар. Дарыухананың урынлашыу урыны бик уңайлы. Бында киң медицина ассортименты тәҡдим ителгән, рецепт буйынса һәм рецептһыҙ һатылған препараттар, һаулыҡ өсөн тауарҙар бар. Биҫтәлә йәшәгән кешеләр өсөн был бик уңайлы. – Көньяҡ-Көнбайыш биҫтәһендә өҫтәмә дарыухана асыу Межгорье ҡалаһын үҫтереү буйынса “Юл картаһы”ның бер пункты. Ул Башҡортостан Башлығы беҙҙең ҡалаға килгәс эшләнгәйне, – тине ҡаланың хакимиәт башлығы Александр Чоловский. Билдәле булыуынса, “Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү” (национальный проект “Малое и среднее предпринимательство и поддержка индивидуальной предпринимательской инициативы”) милли проекты Рәсәй Президенты Владимир Путиндың май указы менән булдырылды. Фото: Межгорье ҡалаһы хакимиәте.