"Ә улар беҙгә килһә?"

Башҡортостандан махсус хәрби операция биләмәһенә үҙ теләге менән барғандар һаны бихисап. Ул, моғайын, халҡыбыҙҙың рухлы, батыр йөрәкле, ватансыл булыуҙары менән аңлатылалыр. Ир-аттар ғына түгел, ҡатын-ҡыҙҙар ҙа унда шәфҡәт туташы, ашнаҡсы булып бара башланы хатта. Һүҙ ҙә юҡ, һуғыш – ир-аттың эше, һәм улар был бурыстарын лайыҡлы башҡара. Хатта йәшенә, һаулығына, ғаиләһенә ҡарап тормай юлланғандар ҙа бар. Бөгөн шундай кешеләрҙең береһе тураһында бәйән итмәксебеҙ. Ишембай районы ауылдарының береһендә йәшәй "Яҡуп" позывнойлы яугир. Уға – 58 йәш. Ҡыҙғанысҡа ҡаршы, фажиғәле шарттарҙа ҡатыны менән улы вафат булып ҡала. Шулай булыуға ҡарамаҫтан, ул лайыҡлы донъя көтә: аҙбар тултырып мал аҫрай, баҡса үҫтерә. Тик күңеле һәр саҡ ҡайҙалыр ашҡына. Махсус хәрби операция башланғас, унда барырға ҡарар итә. Әммә тәүҙә йәше буйынса боралар, аҙаҡ һаулығы менән проблемалары килеп сыға. Шулай ҙа Яҡуп алдына алғандан төңөлмәй, хәрби комиссариат юлын тапауҙы дауам итә. – Беҙ күп балалы ғаиләлә үҫтек. Һәр ваҡыт бер-беребеҙ өсөн терәкбеҙ. Бәләкәй ҡустыбыҙ махсус хәрби операцияға барам тигәс, барыбыҙ ҙа ҡаршы сыҡтыҡ. Йәше лә бара бит. Тик үҙ һүҙен һүҙ итмәһә, ир буламы ни инде ул? Беҙгә өндәшмәй генә комиссия үтеп, байтаҡ ҡына йөрөгәс, уны алырға тигән ҡарар килгән. Китеренә бер нисә көн ҡалғас ҡына әйтте. Борсолһаҡ та, был юлы ҡаршы төшмәнек, ниәт иткәс, барып ҡайтһын, тинек. Бергәләшеп уны юлға йыйҙыҡ. Әле ҡустыбыҙ Төмәндә әҙерлек үтә. Көн һайын бәйләнешкә сығып тора. Барыһы ла һәйбәт тип әйтә, – тип һөйләне уны өлкән апаһы. Яҡуп армия хеҙмәтен Германияла үткән, аҙаҡ юғары уҡыу йортонда уҡыған сағында хәрби кафедра тамамлаған, кесе лейтенант тигән званиеһы бар. Шуға ул ябай һалдат ҡына булып китмәй, ә үҙенә егеттәр туплап, уларҙы алып китәсәк. Әле әҙерлек үтеп йөрөгән яугир менән телефон аша аралашыу форсаты ла тейҙе. – Үҙемде ҡарт бабай тип килһәм, бер ҙә улай булмай сыҡты әле. 60-лап ир-ат араһында төрлө ярыштар үткәрелеп тора. Мин йүгереү буйынса шулар араһында бишенсе булып килдем. Йәш кенә егеттәр артта тороп ҡалды. Тимәк, физик формам яҡшы, – ти Яҡуп. – Махсус хәрби операцияға барыр алдынан күп уйландым. Яҡындарым кире күндереп ҡараһа ла, һүҙемдә торҙом. Ярар әле беҙ тыныс йәшәйбеҙ, ә “тегеләр” илебеҙгә бәреп инһә ни була? Унда бит беҙгә ҡаршы украиндар ғына түгел, ә бик күп илдәрҙән наемниктар һуғыша, араларында насар уйлы әҙәмдәр күп. Шулар беҙгә килеп ҡатындарыбыҙға тейһен, балаларҙы үлтерһенме? Юҡ, бындайға юл ҡуймаясаҡбыҙ. Беҙ ир-егеттәр һәм илебеҙҙе һаҡларға тейешбеҙ. Барыһы ла яҡшы булыр, оҙаҡламай еңеп ҡайтырбыҙ. Яҡуп ошо көндәрҙә махсус хәрби операция биләмәһенә юлланырға тора. Уға ныҡлы һаулыҡ һәм тиҙерәк еңеү менән ҡайтыуын теләйбеҙ. Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында Телеграмда мәғлүмәт таба алаһығыҙ. Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Фото: шәхси архивтан.