Бөгөнгө Хөкүмәт кәңәшмәһендә “Газпром” ойошмаһына ингән республика предприятиелары эшмәкәрлеге тикшерелде. “Газпром трансгаз Өфө” компанияһының генераль директоры Щамил Шәрипов һөйләүенсә, республика йыл һайын 15 миллиард куб метр тәбиғи газ файҙалана. Ә төбәк биләмәһе буйлап дөйөм транзит ағымы күләме 100 миллиард куб метр газдан ашып китә. Ошоға бәйле эштең төп йүнәлеше булып газ транспорты һәм таратыу инфраструктураһын яңыртыу һәм үҫтереү тора. – Предприятие ҡыш миҙгеленә тулыһынса әҙер. Быйыл беҙ биш газ һурҙырыусы агрегатты һәм ете газ таратыусы станцияны капиталь ремонтланыҡ. Бынан тыш 900 километр газ үткәргескә диагностика яһаныҡ, шулай уҡ 10 километрлыҡ участкаһын алмаштырҙыҡ, – тине Шамил Шәрипов. “Газпром” менән “Газпром трансгаз Өфө” компанияларының инвестиция программаһы 2024 йылда 3 миллиард һумға инфраструктура объекттарын техник ҡорамалландырыуҙы һәм төҙөкләндереүҙе күҙ уңында тота. Бынан тыш “Газпром трансгаз Өфө” газ үткәреү һәм социаль газ үткәреү, автомобиль транспортын газ яғыулығына күсереү кеүек мөһим программаларҙа ҡатнаша. Был йәһәттән республиканың транспорт һәм юл хужалығы министры Александр Клебанов, 2020-нән 2022 йылға тиклем метанға 2845 транспорт сараһы күскән, уның дөйөм суммаһы 162,3 миллион һум тәшкил иткән, тине. Быйыл был маҡсатҡа 89,3 миллион һум аҡса ҡаралған, уға 1300 берәмек техника күсереләсәк. – Пассажир транспорты сегментында ҙур ташыусы – “Башавтотранс” компанияһы газ яғыулығында эшләгән 456 автобус менән файҙалана. Шулай уҡ 142 шәхси ташыусының автобусы ошо яғыулыҡта эшләй, – тине министр. Был эштәр менән бер рәттән республикала газ автозаправкалар инфраструктураһын да үҫтерәләр. 2023 йылда улар һаны 51-гә еткән. 2024 йылда тағы унау төҙөләсәк. Башҡортостан Башлығы “Газпром трансгаз Өфө” компанияһына республика менән һөҙөмтәле хеҙмәттәшлеге өсөн рәхмәт әйтте. Ә Транспорт һәм юл хужалығы министрлығына райондарҙа транспортты тәбиғи газға күсереү статистикаһын әҙерләргә ҡушты. Фото: Башҡортостан Башлығы сайты.