Уҡыусыларға мәктәптә психотерапия ярҙамы ла күрһәтеләсәк

Бөгөн Башҡортостан Башлығы Радий Хәбиров үткәргән аҙналыҡ кәңәшмәлә мәктәп медицина хеҙмәтен үҫтереү мәсьәләһе тикшерелде. Һаулыҡ һаҡлау министрының беренсе урынбаҫары Роберт Иштуков хәбәр итеүенсә, республиканың белем биреү учреждениеларында 1136 медицина кабинеты, 128 медицина блогы эшләй. Улар табип-педиатр, процедуралар, прививка яһау һәм стоматология кабинетынан тора. Шулай уҡ 236 айырым стоматология кабинеты бар. Уларҙа 126 табип һәм 496 шәфҡәт туташы эшләй. – Мәктәп медицина хеҙмәткәрҙәре, шул иҫәптән психологтар, ата-әсәләр йыйылыштарында ҡатнаша, төрлө сирҙәрҙе иҫкәртеү буйынса көнүҙәк мәсьәләләр буйынса сығыш яһай. Балаһының һаулығы тураһында мәғлүмәтте ата-әсәләр “К врачу” мобиль ҡушымтаһы аша ала ала, – тине Роберт Иштуков. 2024 йылдан мәктәп уҡыусыларына комплекслы психотерария ярҙамы күрһәтеү системаһын индереү буйынса пилот проект башларға йыйыналар. Уның маҡсаты – балалар һәм үҫмерҙәрҙең үҙ-үҙен тотошондағы аутоагрессив тенденцияларҙы иҫкәртеү, шулай уҡ шәхси мөнәсәбәттәрҙе көйләү. Тәүге этапта бындай кабинеттар ҡаланың өс уҡыу йортонда – 10-сы белем биреү үҙәге, 82-се гимназия һәм Өфө күп профилле профессиональ колледжында эшләй башлаясаҡ. Бынан тыш, 2024 йылда “Юғарыға ос” проектының “Сәләмәт йылмайыу” модуле сиктәрендә ҡорамалдары иҫкергән 126 ғәмәлдәге стоматология кабинеттарын яңырта башлаясаҡтар. Башҡортостан Башлығы, мәктәп медицина кабинеттары табиптар һәм шәфҡәт туташтары менән комплектланған булырға тейеш, тине. – Беҙ планға ярашлы мәктәп медицина хеҙмәтен яңыртабыҙ. Шул уҡ ваҡытта уҡыу йорттарында 50 педиатр һәм 120 шәфҡәт туташы етмәй. Бының өҫтөндә мотлаҡ эшләргә кәрәк. Әгәр беҙ яңы ҡорамаллы стоматкабинеттар асһаҡ, ул буш торорға тейеш түгел. Был мәсьәләне айырым “Сәләмәтлек сәғәтендә” тикшерербеҙ, – тине Радий Хәбиров. Фото: Башҡортостан Башлығы сайты.