Башҡортостан Хөкүмәтенән хәбәр итеүенсә, Башҡортостандың рәсми делегацияһы Ҡытай Халыҡ Республикаһына эш сәфәре менән барҙы. Андрей Назаров Ляонин провинцияһы губернаторы Цзинь Говэй менән осрашты. - Беҙҙең хеҙмәттәшлек 1999 йылда Ляонин провинцияһы менән килешеүҙәр төҙөүҙән башланды. Был документ артабан Башҡортостан һәм Ҡытай араһында фәнни-техник, сауҙа-иҡтисади бәйләнештәрҙе нығытырға ярҙам итте. Башҡортостандың баш ҡалаһы Өфө шул уҡ ваҡытта 2011 йылдан Ляонин провинцияһының баш ҡалаһы Шэньян менән туғандаш ҡала булып һанала, -тине Андрей Назаров. Үҙ сиратында Цзинь Говэй әфәнде Ҡытай-Рәсәй мөнәсәбәттәренен үҫеш тарихында иң юғары дәрәжәгә етеүен билдәләне. Төбәк-ара хеҙмәттәшлек ике ил араһындағы мөнәсәбәттәр өсөн бик мөһим роль уйнай. - Ляонин провинцияһы Рәсәй Федерацияһының барлыҡ субъекттары менән хеҙмәттәшлеккә ҙур әһәмиәт бирә. Мин беләм, Башҡортостан Республикаһы Рәсәйҙә бик мөһим урын алып тора. Төбәк Азия һәм Европа киҫелешендә урынлашҡан, Евразияның йөрәге булып тора. Иҡтисади күрһәткестәр һәм Башҡортостан халҡы һаны буйынса Рәсәй субъекттары араһында алдынғы урында тора, шулай уҡ төбәк тәбиғәт ресурстарының бөтә төрҙәренә лә бай, - тип белдерҙе, Цзинь Говэй әфәнде. Андрей Назаров шулай уҡ туристик йүнәлеше үҫешен дә ҡарарға тәҡдим итте. “Башҡортостан туристары өсөн Ляонинда урынлашҡан Ҡытайҙың иң боронғо тарихи иҫтәлекле урындары һәм һәйкәлдәре ҡыҙыҡлы буласаҡ. Шифахана-курорт ялы сиктәрендә туристик төркөмдәр менән алмашыуға бик шат буласаҡбыҙ”, - тине Премьер- министр. Осрашыу һөҙөмтәһендә уртаҡ эш төркөмөн ойоштороу һәм хеҙмәттәшлекте үҫтереү буйынса юл картаһын формалаштырыу тураһында ҡарар ҡабул ителде. Андрей Назаров Ляонин провинцияһының баш ҡалаһы Шэньянда Башҡортостан вәкиллеген асыу кәрәклеген белдерҙе. Шулай уҡ Өфөнән Шэньянға тура рейстар асыу мәсьәләһе лә ҡараласаҡ. Һөйләшеү аҙағында Андрей Назаров Ҡытай партнерҙарын Өфөгә саҡырҙы. Фото: БР Хөкүмәте сайтынан.