4 – 11 ноябрҙә Өфөләге Рима Баталова исемендәге Спорт әҙерлеге үҙәгендә ҡатын-ҡыҙҙар араһында бокс буйынса Рәсәй чемпионаты үткәрелә. Унда илдең 49 төбәгенән 180-дән ашыу гүзәл зат вәкиле, шул иҫәптән Башҡортостан йыйылма командаһының 11 спортсыһы ҡатнаша. Иң яҡшылар 12 ауырлыҡ үлсәмендә билдәләнә. Сара иһә бөгөн тантаналы асылды. Башҡортостан Хөкүмәте Премьер-министры Андрей Назаров, чемпионатты асып, Рәсәйҙең Бокс федерацияһын ҙур ышаныс белдергәндәре һәм сараны Өфөлә үткәреү башланғысын хуплағандары өсөн рәхмәт белдерҙе. – Республикала боксты тағы ла үҫтереү өсөн башланғыс менән сығыш яһаныҡ. Был – беҙҙең өсөн төп спорт төрҙәренең береһе. Уның менән дүрт меңдән ашыу кеше профессиональ рәүештә шөғөлләнә. Боксерҙарыбыҙ иң юғары кимәлдәге спорт ярыштарында үҙен күрһәтә. Бөгөн чемпионатта ҡатнашыусылар араһында Рәсәйҙең ҡатын-ҡыҙҙар араһындағы ғәмәлдәге чемпионы Азалия Әминева бар. Был Башҡортостан тарихында беренсе еңеү һәм һуңғыһы булмаҫ, тип ышанабыҙ, - тип белдерҙе Премьер-министр. Андрей Назаров республиканың спорт тармағының матди базаһын нығытыу буйынса планлы эш барыуы тураһында белдерҙе. Махсуслашҡан объекттар, шул иҫәптән Олимпия кимәлендәгеләре лә сафҡа инә. 2030 йылға тиклем республиканың стратегик үҫешенә ярашлы, Рәсәйҙең Бокс федерацияһы менән берлектә Башҡортостанда Бокс прогрессы үҙәген төҙөү планлаштырыла. – Башҡортостанда һәр кем спорт, физик культура менән шөғөлләнә алһын өсөн спорт инфраструктураһының 13300 тирәһе объекты бар. Йыл һайын спорт менән шөғөлләнеү өсөн тағы 400-500 яңы объектты сафҡа индерәбеҙ. Киләһе йылда республиканың баш ҡалаһы “Рәсәй – спорт иле” халыҡ-ара форумы ҡатнашыусыларын ҡабул итәсәк. Беҙҙең өсөн был – икеләтә билдәле ваҡиға. 2024 йыл Өфө өсөн юбилей йылы буласаҡ. Уға 450 йәш тула. Шуға масштаблы спорт саралары беҙҙең өсөн ысын бүләккә әйләнәсәк. Улар республикабыҙҙа ғына түгел, илебеҙҙә лә спорт менән физик культураның үҫешенә яңы стимул бирәсәк, – тип һыҙыҡ өҫтөнә алды Андрей Назаров. Рәсәйҙең бокс буйынса чемпионатын асҡанда Башҡортостандың Бокс федерацияһының отчет-һайлау йыйылышы ла булды. Андрей Назаров республиканың Бокс федерацияһы президенты итеп дүрт йылға һайланды. Физик культура һәм спорт тармағына тос өлөш индергәне өсөн Башҡортостан Хөкүмәте Премьер-министры Андрей Назаров Рәсәй Спорт министрлығының Юбилей миҙалы менән наградланды. – Чемпионатта ҡатнашыусыларҙың барыһына ла оҫталыҡ һәм еңеү! Бокс – көс, аныҡлыҡ һәм тиҙлек берҙәмлеге. Шуға барыһына ла уңыштар, ә тамашасыларға яҡшы, сағыу тамаша теләйем. Һәр ваҡыт Башҡортостанда, Бокс федерацияһы сараларында көтәбеҙ, - тине Андрей Назаров. Фото, сығанаҡ: pravitelstvorb.ru/news/22152/