Рәсәй Федерацияһы Президенты Владимир Путин Башҡортостан Башлығы Радий Хәбиров исеменә Халыҡтар берҙәмлеге көнө менән ҡотлау ебәрҙе. “Хөрмәтле Радий Хәбиров! Һеҙҙе Халыҡтар берҙәмлеге көнө менән ҡотлайым! Рәсәйҙең бөйөк тарихы, уның ҡеүәте, ҡаҙаныштары һәм дәүләтселеге ата-бабаларыбыҙҙың күп быуындары тарафынан, уларҙың ныҡлығы һәм ҡаһарманлығы, фиҙәкәр һәм батыр хеҙмәте менән барлыҡҡа килде. Тыуған илгә эскерһеҙ һөйөү, уның яҙмышында шәхси ҡатнашыу бөгөн дә беҙҙең өсөн ышаныслы әхлаҡи нигеҙ булып хеҙмәт итә, Ватан мәнфәғәтенә алға ҡуйылған маҡсаттарға өлгәшеүҙә ярҙам итә. Һеҙгә уңыштар һәм яҡшылыҡтар теләйем. Владимир Путин". *** Рәсәй Хөкүмәте Рәйесе Михаил Мишустин да байрам менән ҡотлау ебәрҙе. “Хөрмәтле Радий Хәбиров! Һеҙҙе Халыҡтар берҙәмлеге көнө менән ҡотлайым! Тыуған илгә һөйөү, бөйөк илебеҙ өсөн ғорурлыҡ тойғоһо һәм уның күп быуатлыҡ тарихына хөрмәт – был байрамдың төп ҡиммәттәре. Ватанды һаҡлаған халыҡ геройҙары батырлығы берҙәмлектең, граждандар тупланғанлығының сағыу миҫалы, ысын илһөйәрлектең өлгөһө булып тора. Һәм бөгөн баһалап бөткөһөҙ мираҫты һаҡлау һәм арттырыу, традицияларға һәм әхлаҡи нигеҙҙәргә тоғролоҡто һаҡлау айырыуса мөһим. Йәмғиәттә үҙ-ара аңлашыу һәм татыулыҡтан илебеҙҙең бөгөнгөһө һәм киләсәге тора. Бергәләп бөтә ауырлыҡтарҙы еңәсәкбеҙ, Рәсәй көслө, ирекле һәм бойондороҡһоҙ держава булып ҡалһын өсөн барыһын да эшләй аласаҡбыҙ. Һеҙгә һәм яҡындарығыҙға артабан уңыштар, һаулыҡ, именлек теләйем. Михаил Мишустин”. *** Волга буйы федераль округында Рәсәй Президентының тулы хоҡуҡлы вәкиле Игорь Комаровтан да ҡотлау килде. “Һеҙҙе Халыҡтар берҙәмлеге көнө менән ҡотлайым! 4 ноябрь – Рәсәй яҙмышында, уның ил булып үҫешеүендә мөһим дата. Бөгөн дә беҙ үҙебеҙҙең азатлығыбыҙҙы, рухи ҡиммәттәребеҙҙе, мәҙәниәтебеҙҙе, тарихыбыҙҙы яҡлайбыҙ. Был ауырлыҡтарҙы еңеп сығыуыбыҙға ышанам, сөнки беҙҙең өсөн иң мөһиме – берҙәмлек бар. Беҙ барыбыҙ ҙа бер халыҡ, беҙҙең тормошобоҙ ҙа, яҙмышыбыҙ ҙа – уртаҡ. Һеҙгә ныҡлы һаулыҡ, рухи көс, тотороҡлолоҡ һәм киләһе көнгә ышаныс теләйем! Игорь Комаров".