Бындай үҙгәрештәр бары яҡшыға!

Ғафури районының Архангел ауылында, “Һаулыҡ һаҡлау” милли проектының тәүге звеноны яңыртыу программаһына ярашлы, яңы фельдшер-акушерлыҡ пункты асылды. Фельдшер-акушерлыҡ пункты Героевка, Победа, Архангел һәм Әхмәт ауылдары халҡын хеҙмәтләндерәсәк. Уларҙа барлығы 198 кеше йәшәй. Яңы бинала тәүге медицина хеҙмәтен күрһәтеү өсөн тейешле шарттар тыуҙырылған: фельдшер, ҡабул итеү, прививка кабинеттары, процедура һәм ял бүлмәләре бар. Заманса медицина учреждениеһында фельдшер Любовь Зорина эшләй. Ул яҡташтарына 1992 йылдан алып медицина ярҙамы күрһәтә. – Ауылда бындай үҙгәрештәр бары яҡшыға! Үҙем өсөн генә түгел, пациенттарым өсөн дә ҡыуанам. Уларҙың араһында оло йәштәгеләр күп. Хәҙер өлкәндәр ваҡытында диспансерлаштырыу үтә аласаҡ, бының өсөн район дауаханаһына барыу кәрәкмәй. Мин эшкә байрамға килгәндәй шатланып йөрөйәсәкмен, бында барыһы ла яңы, уңайлы!– ти Любовь Зорина. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.