Республика уҡыусылары һәм студенттары Халыҡ-ара “Рәсәй” күргәҙмәһендә ҡатнаша

2023 йылдың ноябренән 2024 йылдың апреленә тиклем Мәскәүҙә Халыҡ хужалығы ҡаҙаныштары күргәҙмәһе (ВДНХ) биләмәһендә Халыҡ-ара “Рәсәй” күргәҙмә-форумы үтә. Унда Башҡортостандың белем биреү ойошмаларынан 14-17 йәшлек уҡыусыларҙан һәм уларҙың остаздарынан торған делегация ла ҡатнаша. Улар космолет формаһындағы Башҡортостан стендын асыу сараһында сығыш яһаясаҡ. Был ҙур сараны ойоштороусыларҙың береһе – Дөйөм Рәсәй “Беренселәр хәрәкәте” балалар һәм йәштәрҙең ижтимағи-дәүләт хәрәкәте. - Республикабыҙҙың мәғариф системаһы илдә иң ҙурҙарҙан һанала. Беҙҙең “Беренселәр хәрәкәте” төбәк бүлексәһе үҙ эшмәкәрлегенә 25 меңдән ашыу баланы йәлеп итте, барлығы 1257 беренсел ойошма төҙөлдө. Башҡортостан – “Беренселәр хәрәкәте” буйынса яуланған гранттар һаны буйынса ла иң алдынғыларҙың береһе. 62 миллион һум суммаға торошло 28 проектыбыҙ еңеүсе тип табылды, - тине БР мәғариф һәм фән министры Илдар Мәүлетбирҙин. Мәскәүҙә ойошторолған күргәҙмәне, төркөмдәргә бүленеп, 2500-ҙән ашыу республика уҡыусыһы ҡараясаҡ. 2023 йылдың ноябренән 2024 йылдың апреленә тиклем баш ҡалаға 40 делегацияның сәйәхәте ойоштороласаҡ. Шулай уҡ Башҡортостан Мәғариф һәм фән аҙналығында ҡатнашасаҡ. Республиканың алдынғы колледждары БР Йылдам һөнәри әҙерлек үҙәге менән берлектә һөнәри һынауҙар тәҡдим итәсәк. Мәҫәлән, балдың сифатын тикшереүҙә арналған “Ни өсөн космонавтар тап башҡорт балын ашай?” тигән лаборатор тикшереү, космоста туҡланыу буйынса күнекмәләр, 6-9 йәшлек балалар өсөн “Королев вариҫтары: үҙеңдең космик ракетаңды эшлә!” күнекмәһе, Марста хәрәкәт итәсәк роботты программалау һ.б. тәҡдим ителәсәк. Бынан тыш, күргәҙмәгә килеүселәр башҡорт теле буйынса оҫталыҡ дәресендә лә ҡатнаша ала, унда космосҡа ҡағылышлы яңы терминдар һәм һүҙбәйләнештәр тикшереләсәк. Фото: БР мәғариф һәм фән министрлығы.