Стресс менән нисек көрәшергә? Үҙеңдең генә ҡулыңдан килмәгәндә кемдең ярҙамына таянырға мөмкин? Башҡортостан юлдаш телевидениеһының “Сәләм” программаһына Республикаға идара итеү үҙәгенән тура бәйләнешкә Республика клиник психиатрия дауаханаһының баш табибы Таһир Ғиззәтуллин сыҡты. Ҡыҙыҡ, эштә йәки уҡыуҙа булғанда сәстәрҙе тарау йәки ҡулдарҙы ыуғылау, үҙ-үҙеңә массаж яһау йәки туңдырма ашау ҙа нервылар ҡуҙғығанда ярҙам итә икән. Файҙалы һәм ябай ғына ошо алымдарҙы ҡулланыу стрестан ҡотолдора, ти белгестәр. Тын алыу гимнастикаһы – күптән һыналған универсаль күнегеү. Иң мөһиме – стресты еңеү өсөн йоҡо режимын теүәл үтәгеҙ, көсөргәнеште тигеҙ бүлегеҙ. Яратҡан шөғөлдәрегеҙгә ваҡыт бүлегеҙ, яҡындарығыҙ менән аралашығыҙ. Әгәр ҙә һеҙ ярҙам кәрәк икәнен тойһағыҙ, психологҡа мөрәжәғәт итегеҙ. Башҡортостанда был хеҙмәтте бушлай алырға мөмкин, йәшәгән урындағы поликлиникаға йәки Өфө ҡалаһындағы Республика клиник психиатрия дауаханаһының амбулатор-психоневрология бүлексәһенә яҙылығыҙ. Һеҙ бында квалификациялы ярҙам аласаҡһығыҙ. Эфир яҙмаһындағы файҙалы кәңәштәрҙе тыңлағыҙ. Видео: Башҡортостан Республикаға идара итеү үҙәге.